راولپنڈی(آن لائن)پاکستان تحریک انصاف کے مرکزی رہنما شاہ محمود قریشی نے کہا ہے کہ پانامہ لیکس کی تحریک کسی فرد یا خاندان کے خلاف نہیں صرف کرپشن کے خلاف ہے یہ کرپشن ہٹائو ملک بچائو کی تحریک ہے ان خیالات کا اظہارانہوں نے منگل کے روزانصاف لائرز فورم راولپنڈی کی دعوت پر جوڈیشل کمپلیکس ہال میں وکلا سے خطاب کرتے ہوئے کیا ، اس موقع پر ڈسٹرکٹ بار کے صدر شوکت رئوف صدیقی، چوہدری اسد، قیصر عباس شاہ اور انصاف لائرز فورم کے اراکین سمیت دیگر موجود تھے، شاہ محمود قریشی نے کہا کہ وزیر خارجہ کے عہدے سے جب مستعفی ہوا تو راولپنڈی بار نے سب سے پہلے عزت بخشی،ملک میں آئین توڑا اورمعطل کیا جاتا رہا، آرٹیکل 6کی خلاف ورزیاں کی جاتی رہیں، ہمار ملک اس وقت دوراہے پر کھڑا ہے اور نازک دور سے گزر رہا ہے، اگر ہم نے یہ موقع ضائع کیا تو برسوں کوستے رہیں گے، انہوں نے کہا کہ پانامہ لیکس کی تحریک کسی فرد ، خاندان کے خلاف نہیں صرف کرپشن کے خلاف ہے، یہ تحریک کرپشن ہٹائو ملک بچائو کی ہے، پانامہ پیپرز صرف پاکستان کی حد تک نہیں ہے، پانامہ پیپرز نے انکشاف کئے ہیں ہمیں تو اس کے بارے میں علم نہیں تھا، حکومت نے کو شش کی کہ سابق جج سے تحقیقات کرائی جائیں، مگر ہم نے انکار کیا، کرپشن کے تدارک کی نیب کی آئینی و قانونی ذمہ داری ہے، کرپٹ افراد کے خلاف سخت سے سخت کاروائی کی جانی چاہئے، انہوں نے کہا کہ وزیر اعظم نے دو مرتبہ قوم اور پھر پارلیمنٹ سے خطاب کیا مگر قوم آج بھی حقیقت جاننے کی منتظر ہے، ہم ایسا ٹی آر اوز بنانا چاہتے ہیںجن کی بنا پر چیف جسٹس فیصلہ کر سکیں کہ کون کرپٹ ہے اور کون نہیں ہے، جن ٹی آر اوز پر حکومت متفق نہیں ہوئی ان پر بات چیت کرکے ایک دوسرے کو متفق کیا جائے گا، ملک سے کرپٹ حکمرانوں سے عوام کی جان چھڑائی جائے، انہوں نے کہا کہ اپوزیشن کی جانب سے ٹی آر اوز کمیٹی کا نوٹیفکیشن جاری ہو نے کے بعد اجلاس ہو گا،صدر ضلعی بار ایسوسی ایشن شوکت رئو ف صدیقی نے خطاب کرتے ہوئے کہا کہ تحریک انصاف کے چیئر مین عمران خان نے احتساب کی لئے خود کو پیش کیا، اب موقع ہے احتساب کا ورنہ حکمران دیمک کی طرح چاٹ جائیں گے۔