کرک (آئی این پی )عمران خان کے ’’خواب‘‘ کو آگ لگادی گئی، گرین خیبر پختونخواہ کا خواب ملیا میٹ ،نامعلوم شرپسندوں کیجانب سے منزلئی پہاڑی سلسلے میں لگنے والی آگ پر 24 گھنٹے بعد بھی قابو نہ پایا جاسکا ایک ارب روپے سے زائد زیتون کے قیمتی درخت جل کر خاکستر ہوگئے آگ بجھانے میں مصروف ایک درجن سے زائد رضاکار پھنس گئے ۔ضلع کرک کے تحصیل بانڈہ داؤد شاہ کے علاقے اربشی کے پہاڑی علاقے منزلئی کے جنگلات میں ہفتے کی دوپہر دو بجے نامعلوم شرپسندوں کیجانب سے لگائی جانیوالی والی آگ پر تاحال تک قابو نہ پایا جاسکاجس کے باعث چھ مربع کلومیٹر تک کا جنگل جل کر خاکستر ہوگیا جس سے مجموعی طور پر ایک ارب روپئے سے زائد کے زیتون کے قیمتی درخت جل کر خاکستر ہوگئے مقامی آبادی کے مطابق اس سلسلے میں ضلعی انتظامیہ کو بروقت آگاہ کیا گیا مگر تاحال تک کوئی شنوائی نہیں ہوئی حتی کہ مقامی پولیس نے بھی تاحال تک خبر نہیں لی ہے جبکہ مقامی رضاکار جو کل سے آگ بجھانے کی کارروائیوں میں مصروف ہیں میں درجنوں رضاکار وں کی بیہوشی اور ایک درجن سے زائد کے پھنس جانے کی خبریں بھی موصول ہوئی ہے اور یہ بھی بتایا جارہا ہے کہ اگر آگ پر جلد قابو نہ پایا گیا تو بہادرخیل ،آمانکوٹ اور ٹیری کے پہاڑی سلسلے کو بھی اپنی لپیٹ میں لے سکتا ہے ۔جس سے مقامی آبادی کو بھی شدید نقصان پہنچنے کا اندیشہ ظاہر کیا جارہا ہے ۔