اسلام آباد (آن لائن) سنی تحریک کے سربراہ ثروت اعجاز قادری نے کہا ہے کہ پانامہ لیکس کے انکشافات کے بعد نواز شریف کو اقتدار میں رہنے کا کوئی حق نہیں ہے۔ ایم کیو ایم اور الطاف حسین پر را سے فنڈنگ حاصل کرنے کے الزامات کی تحقیقات ہونی چاہیئے۔ نیشنل ایکشن پلان پر سو فیصد عمل درآمد وقت کی اہم ضرورت ہے۔ ان خیالات کا اظہار انہوں نے ایک میگزین کو دیئے جانے والے انٹرویو میں کیا ہے ۔ انہوں نے کہا کہ دہشتگردی ، کرپشن اور نا انصافی کو ختم کئے بغیر کوئی بھی عماشرہ ترقی نہیں کر سکتا اگر ادارے مضبوط ہوں تو ملک میں پانامہ لیکس میں ملوث افراد کا بلا تفریق احتساب کیا جا سکتا ہے انہوں نے کہا کہ پانامہ لیکس میں وزیراعظم کے بیٹوں کے نام سامنے آنے کے بعد وزیراعظم کو اخلاقی طور پر مستعفی ہو جانا چاہیئے اور پارلیمنٹ میں اپنے اثاثوں کی تفصیلات پیش کرنی چاہیئے۔ انہوں نے کہا کہ کراچی میں ایم کیو ایم اور الطاف حسین پر را سے فنڈنگ کے الزامات لگے ہیں تو یہ صرف الزامات نہیں ہونے چاہیئں بلکہ ان کی تحقیقات ضروری ہے تاکہ سچ سامنے لایا جا سکے۔ انہوں نے کہا کہ اقتصادی راہداری ایک اچھا منصوبہ ہے مگر موجودہ حکومت کی ناقص حکمت عملی کی وجہ سے راہداری جیسے اہم منصوبے پر فوج کو یقین دہانیاں کرانی پڑ رہی ہیں۔ انہوں نے کہا کہ اقتصادی راہداری کے ثمرات تمام صوبوں کو ملنے چاہیئے۔ انہوں نے کہا کہ نیشنل ایکشن پلان پر سو فیصد عمل درآمد کرنا وقت کا اہم تقاضہ ہے ۔ آپریشن کو منطقی انجام تک لیجانا ناگزیر ہے ۔ کراچی میں آپریشن کی وجہ سے حالات مثبت سمت میں جا رہے ہیں۔