ملتان(آئی این پی) نشتر ہسپتال میں سپرنٹنڈنٹ نرس کے ناروا رویہ اور سکارف پہننے پر پابندی کیخلاف نرسوں کیجانب احتجاجی دھرنا چوتھے روز بھی جاری رہا ، احتجاج میں شریک نرسز نے نشتر روڈ بلاک کر کے اپنے مطالبات کے حق میں شدید نعرہ بازی کی جبکہ دوسری طرف نشتر ہسپتال انتظامیہ نے احتجاج کرنے والی چالیس نرسوں کو شوکاز نوٹس جاری کردیا ۔تفصیلات کے مطابق نشتر ہسپتال ملتان کی نرسز سپرنٹنڈنٹ نرس کیخلاف احتجاج کرتے ہوئے چوتھے روز بھی سڑک پر نکل آئیں اور نشتر روڈ بلاک کر دیا ۔ مظاہرین نے پلے کارڈز اور بینرز اٹھا رکھے تھے جن پر سپرنٹنڈنٹ نرس کیخلاف نعرے درج تھے ۔ نرسز نے وارڈز میں بھی کام بند کر دیا اور الزام لگایا کہ سپرنٹنڈنٹ نرس انہیں سکارف نہیں پہننے دے رہی اور نہ ہی انہیں ایمرجنسی کی صورت میں چھٹی دی جاتی ہے ۔ مظاہرین نے کہا کہ کئی نرسز آگے پڑھنا چاہتی ہیں تاہم ہیڈ نرس کی جانب سے پڑھنے کی بھی اجازت نہیں دی جا رہی ۔ مظاہرین نے مطالبہ کیا کہ سپرنٹنڈنٹ نرس کوکب کو فوری تبدیل کیا جائے جبکہ نرسز نے کہا کہ مطالبات تسلیم نہ کئے گئے تو احتجاج کا سلسلہ جاری رہے گا جبکہ دوسری جانب نشتر ہسپتال انتظامیہ نے احتجاج کرنے والی چالیس نرسوں کو شوکاز نوٹس جاری کردیا جس میں فوری طور پر جواب طلبی کی گئی ہے ۔