اسلام آباد(آئی این پی) پاکستان تحریک انصاف کے چیئرمین عمران خان نے قومی اسمبلی کے علا وہ عوامی و انتخابی جلسوں میں اپنے خطابات کے دوران پیپلز پارٹی کو کرپشن کے حوالے سے کلین چٹ دیدی ہیں، گزشتہ روز قومی اسمبلی کے علاوہ مظفر آباد اوربھمبر آزا د کشمیر میں ہونے والے جلسوں میں تقریروں کے دور ان انہوں نے پیپلز پارٹی کے دور کی کرپشن تک کا تذکرہ نہ کیا، ماضی میں وہ جس خورشید شاہ کے خلاف انتہائی سخت لب و لہجہ اختیار کرتے تھے اب ان کی تعریفوں میں مصروف ہیں ۔ تفصیلات کے مطابق گزشتہ روز قومی اسمبلی سے خطاب اورپھر مظفر آباد اوربھمبر آزا د کشمیر میں ہونے والے جلسوں میں تقریروں کے دور ان تحریک انصاف کے سربراہ عمران خان نے دعویٰ کیا کہ موجودہ دور میں گزشتہ تمام ادوار سے زیادہ کرپشن ہو رہی ہے اور ملک میں سرمایہ کاری نہیں آرہی جہاں کرپشن ہوتی ہے وہاں سرمایہ کاری نہیں ہوتی ۔ میٹرو بس اورنج ٹرین اور موٹرویز جیسے منصوبے ملکی معیشت کے لئے نقصان دہ ہیں ۔ عمران خان نے اس حوالے سے ماہرین معاشیات اور شماریات کے حوالے بھی دیئے، عمران خان نے بھمبر جلسے میں کہاکہ نواز شریف حکومت نے تین سالوں میں پانچ ہزارارب کا قرض لیا جس سے لندن میں فلیٹس اور آف شور کمپنیاں بنائی گئیں تاہم انہوں نے پیپلزپارٹی کے رہنماؤ ں پر تنقید سے گریزکیا ۔ واضح رہے کہ اس سے پہلے عمران خان پیپلز پارٹی کے شریک چیئرمین و سابق صدر آصف علی زرداری کو ملک کا کرپٹ ترین شخص قرار دیتے رہے اور وہ ان پر کڑی تنقید کرتے رہتے تھے ۔ این آئی سی ایل سکینڈل ، رینٹل پاور اور دیگر سکینڈلز پر ہمیشہ انہوں نے پیپلز پارٹی کو آڑے ہاتھوں لیا جب کہ اپنی کئی تقاریر میں انہوں نے خورشید شاہ کو وزیر اعظم نواز شریف کا منشی بھی قرار دیا تاہم قومی اسمبلی اور جلسوں میں دیگر تقریرو ں کے دوران وہ صرف خورشید شاہ کی تعریفیں کرتے رہے اور انہیں کرپشن کے حوالے سے پیپلز پارٹی کو کلین چٹ دی ۔