اسلام آباد (نیوز ڈیسک) وزیر اعظم نواز شریف نے کہا ہے کہ 2018 کے الیکشن میں ترقی کے دشمن قوتوں کوشکست دیں گے اورآئندہ الیکشن میں عوام کی عدالت میں روشن اور بہتر پاکستان کے ساتھ پیش ہوں گے ۔ارکان قومی اسمبلی عبداللہ شادی خیل ، شازیہ مبشر ، میاں عبد المنان سے گفتگو کرتے ہوئے وزیر اعظم نواز شریف نے کہا کہ حکومت عوام کو بنیادی سہولتوں کی فراہمی کے لیے موثر کام کر رہی ہے ۔ عوام کی زندگیوں میں آسانی کے لئے ملک بھر میں پروگراموں پرتیز رفتاری سے عمل درآمد جاری رہے گا ۔ وزیر اعظم نواز شریف نے کہا کہ پاک چین اقتصادی راہداری اور انفراسٹرکچر کے منصوبوں کواسی رفتار سے جاری رکھا جائے گا ، پاکستان مسلم لیگ (ن) کی حکومت فلاح عامہ کے لئے دن رات کام کر رہی ہے ۔اس سے قبل وزیراعظم نواز شریف سے شہید کیپٹن اسفند یار کے والد ڈاکٹر فیاض بخاری نے اسلام آباد میں ملاقات کی ، وزیراعظم نواز شریف نے کہا کہ کیپٹن اسفند یار شہید ملک و قوم کا فخر ہیں، اسفند یار اور پاک فوج کے دیگر شہداء نے جان کی قربانیاں دے کر ملکی بقاء کو یقینی بنایا، دہشتگردی کیخلاف پاک فوج کے جوانوں نے لازوال داستانیں رقم کیں، انشاء اللہ اسفند یار شہید جیسے جرات مند اور بہادر سپوتوں کی وجہ سے دہشتگردی کیخلاف جنگ جیتیں گے، وزیراعظم نے مادر وطن کیلئے قربانی دینے والے جوانوں کے والدین کو بھی خراج تحسین پیش کیا ۔