پشاور(این این آئی)خیبر پختونخوا کے ضلع ٹانک میں عمران خان سے جلسے کیلئے آٹھ کروڑ طلب کرنے والے نواب آف ٹانک بھی ان کے قافلے میں شامل ہوگئے۔ گزشتہ روز رکن صوبائی اسمبلی فضل الہٰی کے ساتھ اپنے قوم سلمان خیل کے ہمراہ پارٹی میں باقاعدہ شمولیت کا اعلان کردیا۔ نوابزادہ سعادت خان نے 2013میں ہونے والے عام انتخابات سے قبل جب عمران خان وزیرستان جارہے تھے اور ٹانک میں جلسہ کررہے تھے تو انہیں اجازت نہیں دی جارہی تھی اس کے بدلے عمران خان سے آٹھ کروڑ روپے کا مطالبہ کردیا تھا ۔تاہم وہ گزشتہ روز اپنے قوم کے ہمراہ ان ہی کے قافلے میں شامل ہوگئے ۔فضل الہٰی کے مطابق مولانا فضل الرحمن کی حقیقت سے لوگ آہستہ آہستہ آگاہ ہوتے جارہے ہیں اور ان ہی کے حلقے میں بھی ان کے پارٹی سے سینکڑوں اہم ترین شخصیات ان کے پارٹی سے جلد مستعفی ہوکر پی ٹی آئی میں شمولیت اختیار کرلیں گے۔ انہوں نے ہمیشہ عوام کو دھوکہ دے کر ہی سیاست کی ہے اگر وہ عوام کے ساتھ مخلص ہوتے تو وہاں کے لوگوں کی تقدیر بدل جاتی۔ لیکن انہوں نے عوام کی خدمت کرنے کے بجائے ڈیزل کے پرمٹ پر زیادہ توجہ دی ہے ۔