لاہور (این این آئی)پاکستان کرکٹ بورڈ(پی سی بی) کے چیئرمین شہریار خان نے کہا ہے کہ قومی ٹیم کے سابق کپتان شاہد آفریدی کیلئے سینٹرل کنٹریکٹ کا دارومدار ان کی کارکردگی پر ہے۔ورلڈ ٹی ٹوئنٹی کی ناکام مہم کے بعد شاہد آفریدی نے قومی ٹیم کی قیادت سے استعفیٰ دے دیا تھا ٗ انضمام کی زیرسربراہی سلیکشن کمیٹی نے نوجوان کھلاڑیوں کو مواقع فراہم کرنے کیلئے دورہ انگلینڈ کے ممکنہ کھلاڑیوں کی فہرست میں سابق کپتان کا نام شامل نہیں کیاممکنہ کھلاڑیوں میں نام شامل نہ ہونے کے باوجود سینٹرل کنٹریکٹ میں شامل کھلاڑیوں کی ٹریننگ کیمپ میں شرکت لازمی ہے تاہم شاہد آفریدی نے گھٹنے میں تکلیف کے سبب کیمپ میں شرکت سے معذرت کر لی تھی۔اسٹار آل راؤنڈر نے کہا کہ میں انگلش کاؤنٹی میں ہیمپشائر کی نمائندگی کیلئے مکمل فٹنس حاصل کرنا چاہتا ہوں لہٰذا میں جیسے ہی سلیکشن کیلئے دستیاب ہوں گا، فٹنس ٹیسٹ دے دوں گا تاہم اب قومی ٹیم شمولیت کیلئے کوشاں شاہد آفریدی کو سینٹرل کنٹریکٹ ملنے کے بھی لالے پڑ گئے۔ایک انٹرویو میں شہریار خان نے کہا کہ انجری کے سبب آفریدی کے کیمپ میں شرکت نہ کرنے کے باوجود اصل توجہ ان کی کارکردگی پر ہی ہو گی۔اس موقع پر جب ان سے سوال کیا گیا کہ کیا گزشتہ سال کی طرح سابق کپتان براہ راست سینٹرل کنٹریکٹ حاصل کرنے میں کامیاب رہیں گے تو پی سی بی چیئرمین نے کہا کہ سینٹرل کنٹریکٹ میں اسٹار آل راؤنڈر کی شمولیت کا دارومدار سلیکشن کمیٹی پر ہے۔تینوں فارمیٹ میں قومی ٹیم کی قیادت کرنے والے سابق کپتان پی سی بی کے سینٹرل کنٹریکٹ کی اے کیٹیگری میں شامل ہیں جس کا اختتام 30 جون کو ہو گا۔شہریار خان نے تصدیق کی کہ آنے والے دورہ انگلینڈ میں انتخاب عالم ہی قومی ٹیم کے منیجر ہوں گے کیونکہ انہوں نے حالیہ دنوں میں اچھی کارکردگی کا مظاہرہ کیا۔انہوں نے کہاکہ باؤلنگ کوچ کی تقرری کا فیصلہ ہیڈ کوچ مکی آرتھر کی مشاورت سے کیا جائیگا ٗ بیٹنگ کوچ گرانٹ فلاور اور گرانٹ لیوڈن کے مستقبل کا فیصلہ بھی مکی آرتھر کی پاکستان آمد پر پی سی بی حکام سے ملاقات کے بعد کیا جائیگا۔