لاہور (این این آئی پنجاب اسمبلی میں اپوزیشن لیڈر میاں محمود الر شید نے کہا کہ پنجاب میں رئیسانی سے بڑے چور بیٹھے ہیں، نیب کا خاموش رہنا اور کارروائی نہ ہونا سمجھ سے بالاتر ہے۔ان خیالات کا اظہار انہوں نے گزشتہ روز پنجاب پبلک سیکرٹریٹ میں صحافیوں سے گفتگو کرتے ہوئے کیا۔ انہوں نے کہاکہ قرض معاف کروانے والے بھی قومی مجرم ہیں انکا بھی کڑا احتساب کرتے ہوئے ملکی دولت واپس لی جانی چاہیے۔ میاں محمود الر شید نے کہا کہ اب وقت آگیا ہے کہ احتساب کے عمل سے ہر شخص کو گزارا جائے۔ وزیر اعظم احتساب سے فرار کے راستے ڈھونڈ رہیں ہیں لیکن وہ خواب غفلت میں ہیں اور جب وہ اٹھے تو خود کو ا ڈ یالہ میں پائیں گے جس دن حقیقی احتساب کا کوڑابر ساموجودہ اور سابقہ حکمرانوں میں سے کوئی نہیں بچ سکے گا۔ میاں محمود الر شید نے مزید کہا کہ کرپشن سے پاکستان کے وجود کو خطرہ ہے ، ملک کو بچانا ہے تو کرپشن کرنے والوں کے خلاف دہشت گردی کے مقدمات بنائے جائیں اور انہیں چو کوں اور چوراہوں میں لٹکایا جائے تاکہ ان کی آنے والی نسلیں بھی کرپشن سے توبہ کر لیں۔ سیکرٹری بلوچستان سے متعلق سوال کے جواب میں قائد حزب اختلاف کا کہنا تھا کہ مشتاق رئیسانی چھوٹا چور ہے پنجاب میں اس سے بڑے مگر مچھ بیٹھیں ہیں لیکن حیرت کی بات ہے کہ وہ محفوظ ہیں ان پر کارروائی نہیں ہو رہی۔