لاہور ( نیوزڈیسک) تحریک انصاف کے یکم مئی کے جلسے کے چیف آرگنائزر عبدالعلیم خان کی ہدایت پر رکن پنجاب اسمبلی محمد شعیب صدیقی نے تھانہ سول لائن میں (ن) لیگ کے خلاف قانونی کاروائی کے لئے درخواست جمع کروا دی ۔جس میں کہا گیا ہے کہ پی ٹی آئی نے جلسہ گاہ کیلئے تمام انتظامات خود برؤئے کار لائے تھے اور سکیورٹی خدشات کے تحت خواتین کیلئے علیحدہ انکلوژر بنایا گیا ہمیں باوثوق ذرائع سے اطلاع ملی تھی کہ (ن) لیگ کے شر پسند عناصر جلسے میں بد نظمی پیدا کرنے کی کوشش کریں گے جس کی اطلاع انتظامیہ و پولیس کو بھی پہلے ہی کر دی گئی تھی شعیب صدیقی نے کہا کہ جلسہ گاہ میں جلسہ ختم ہونے تک ایک سوئی بھی نہیں گری البتہ جلسے کے اختتام کے بعد جلسہ گاہ سے نکلنے والی خواتین کے ساتھ بد تمیزی،چھیڑ خوانی ،دست درازی اور ہاتھا پائی کی گئی، اُن پر فقرے بازی ہوئی اور سروں سے دوپٹے چھینے گئے خواتین کو ہراساں کرنے والوں کی ٹی وی چینلز اور سی سی ٹی وی ریکارڈنگ بھی موجود ہے اور (ن) لیگ کے ان شر پسند عناصر کو با آسانی پہچانا جا سکتا ہے شعیب صدیقی نے کہا کہ جلسے کے شاندار انتظامات پر عمران خان نے عبدالعلیم خان اور پی ٹی آئی کی ٹیم کو مبارکباد دی جس سے پریشان ہو کر (ن) لیگ نے طے شدہ غنڈہ گردی کا مظاہرہ کیا انہوں نے کہا کہ ان چہروں کو پولیس کے علم میں بھی لایا گیا لیکن انہوں نے پس و پیش سے کام لیا شعیب صدیقی نے ان عناصر کو فوری طور پر گرفتار کرنے اور اُن کے خلاف قانونی کاروائی عمل میں لانے کا مطالبہ کیا ہے انہوں نے کہا کہ وہ بطور ایم پی اے اس مسئلہ کو پنجاب اسمبلی میں بھی اٹھائیں گے ۔