لاہور ( نیوزڈیسک)سربراہ پاکستان سُنّی تحریک محمدثروت اعجازقادری نے 8مئی سے حکومت مخالف تحریک کے با قائد ہ آغاز کا اعلان کرتے ہوئے کہا ہے کہ دہشتگردی،کرپشن،لا قانونیت سے پا ک روشن پاکستان کی بنیادرکھنے کیلئے قوم ہماراساتھ دے، 8مئی کو لاہورمیں ہونے والا روشن پاکستان مارچ دہشتگردی اورکرپشن کیخلاف اور پاک فوج کی حمایت میں قوم کی آوازثابت ہوگا ۔ان خیالات کااظہارانہوں نے سنی تحریک کے ڈویثرنل صدر مولانا مجاہد عبد الرسول خان ، سردار محمد طاہر ڈوگر سے گفتگوکرتے ہوئے کیا۔ثروت اعجاز قادری نے کہا کہ ملکی ترقی میں سب سے بڑی رکاوٹ حکمرانوں کی بد نیتی اور کرپشن ہے،پانامہ لیکس پر اپوزیشن جماعتوں کا آپس میں اتحاد د نہ ہونے کا فائدہ وزیراعظم اورانکے خاندان کو پہنچ رہاہے،ضرب عضب اور قومی ایکشن پلان کی کامیابی کے علاوہ دہشت گردی کے خلاف دوسرا کو ئی آپشن نہیں،دہشتگردی کے خلاف پاک فوج کے ساتھ کھڑے ہیں ،پا کستان سنی تحریک ملک بھر میں سول اپوزیشن کا کر دار ادا کرتی رہے گی۔ انہوں نے کہا کہ بد عنوانی نے ملک کو دھمک کی طرح چاٹ لیا ہے،قومی لٹیروں اورڈاکوؤں کا بے رحمانہ احتساب کرنے کا وقت آچکا ہے،دہشت گردی کیخلاف جاری جنگ میں حکومت اور فوج ایک پیج پر نہیں ہیں،سول اداروں کی غفلت کی وجہ سے دہشتگرد پھر مضبوط ہورہے ہیں۔