نئی دہلی(نیوز ڈیسک )معروف غزل گلوکار غلام علی نے کہا ہے کہ کچھ بڑی طاقتیں پاکستان اور بھارت کے بہتر تعلقات نہیں چاہتیں اور وہی گڑبڑ کرتی رہتی ہیں ،دونوں ممالک کے عوام کھیل اورموسیقی تمام میدانوں میں امن اور بھائی چارے سے رہنا چاہتے ہیں ،پاک بھارت خارجہ سیکرٹری مذاکرات کی کامیابی کیلئے دعا گو ہوں ۔ منگل کو میڈیا سے گفتگو کرتے ہوئے انہوں نے انڈیا اور پاکستان کے درمیان خارجہ سیکریٹری سطح کی مذاکرات کی کامیابی خواہش کے ساتھ کہا کہ اوپر بیٹھے لوگ نہیں چاہتے کہ دونوں ملکوں کے لوگ مل جل کر رہیں۔ انھوں نے ہندوستان اور تعلقات میں بہتری کی دعا کی ہے۔ہند و پاک تعلقات کے بارے میں ایک سوال کے جواب میں انھوں نے ہنستے ہوئے کہاکہ ہمارے اوپر جو بڑی طاقتیں ہیں ان کی وجہ سے بھی یہ گڑبڑ ہوتی ہے کیونکہ اوپر والے لوگ یہ نہیں چاہتے کہ یہ آپس میں مل کر بیٹھیں۔ حالانکہ ہمسائے آپس میں بھائی ہوتے ہیں۔ اور ان میں تو پریم ہی ہونا چاہیے۔انھوں نے کہا کہ وہ دعا کریں گے کہ دونوں ممالک کے لیے یہ اجلاس بہتر ثابت ہو۔فنکاروں کے تعلق سے دونوں ملکوں میں ہونے والی سیاست کے سوال پر غلام علی نے کہا کہ فنکاروں کا اس معاملے میں دخل نہیں۔ انھوں نے کہا کہ دونوں ملکوں میں محبت بڑھے اور ہم محبت کا پیغام دیتے ہیں۔رواں سال انڈیا کے کئی شہروں میں پاکستان فنکار کے خلاف احتجاج کے نتیجے میں غلام علی کے پروگرام منسوخ کر دیے گئے تھے۔ اس پر انھوں نے اپنے مخالفین کے لیے دعا کی کہ انھیں اچھی سمجھ عطا ہو۔انھوں نے کہا کہ چاہے وہ کھیل کا میدان ہو یا پھر گیت و موسیقی کا پلیٹ فارم، دونوں ہی ممالک کے عوام امن اور بھائی چارہ چاہتے ہیں لیکن ’چند مٹھی بھر لوگوں کو شاید یہ گوارا نہیں۔