فیصل آباد( نیوز ڈیسک) پاکستان کے کرکٹ ٹیم کے نو منتخب چیف سلیکٹر انضمام الحق نے کہا ہے کہ بلاشبہ ملک میں ٹیلنٹ موجود ہے لیکن صرف ٹیلنٹ سے کام نہیں چلے گا۔ ان کے بقول نوجوان کھلاڑیوں کی صلاحیتوں کی جدید طرز کی کرکٹ کے مطابق نکھارنا ہو گا۔ انہوں نے کہا کہ نیا ٹیلنٹ تلاش کرنے کے لیے ہمیں خود گرائونڈ ز میں جانا ہو گا ، ماضی کی طرح صرف اسکور کارڈ کی بنیاد پر کھلاڑی منتخب نہیں کریں گے، دیکھیں گے کہ کھلاری نے کس کنڈیشن اور کن بالرز کے خلاف اچھا کھیل پیش کیا، پریشر اور دبائو میں کم اسکور کرنے والے کھلاڑیوں کو بھی سلیکٹ کریں گے۔ انضمام کا کہنا تھا کہ کھلاڑیوں کو اپنی صلاحیتوں کے اظہار کے لیے کئی اہم مواقع ہیں ، پاکستان کپ اور پھر قائداعظم ٹرافی کے ایونٹ بھی ہونے ہیں۔ انہوں نے کہا ہے کہ پاکستان ٹیم کو اچھے اوپنرز اور اسپنرز کی ضرورت ہے ، مذکورہ ایونٹس میں اچھے سلو گیند باز اور اوپنرز کا انتخاب کریں گے ، ماضی میں ہم دیکھتے آرہے ہیں کہ اوپننگ جوڑی میں صرف ایک کھلاڑی رنز کرتا رہا ہے۔ نو منتخب چیف سلیکٹر کے مطابق گرین شرٹس کو اس وقت کئی اہم مسائل کا سامنا ہے جن میں فٹنس ایک اہم مسئلہ ہے، فٹنس ٹھیک نہ ہونے کے سبب آپ کی کارکردگی اوپر سے نیچے کی طرف آجاتی ہے ، معاملات بہتر ہونے میں وقت لگے گا تاہم پر امید ہوں کہ وقت کے ساتھ ساتھ تمام چیزوں کو بہتر بنا لیں گے۔ سلیکشن کمیٹی کے انتخاب سے متعلق ایک سوا ل پر انہوں نے کہا ہے کہ ڈومیسٹک اور فرسٹ کلاس کرکٹ سے وابستہ افراد کا انتخاب کیا ہے، کھیل کے تینوں شعبوں سے ماہرین کا انتخاب کیا ہے، ڈومیسٹک لیولز سے وابستگی کی بدولت نوجواب کھلاڑیوں پر ان کی نظر ہے اور وہ مستقبل میں بہتر ٹیم کا انتخاب کریں گے۔