کراچی (نیوزڈیسک)پاکستان تحریک انصاف کے رہنما حلیم عادل شیخ نے کہا ہے سندھ میں کاپی کلچر کے بڑھتے ہوئے رحجان نے اس قوم کا مستقبل تباہ کردیاہے ،سندھ پبلک سروس کمیشن نے قوم کے معماروں کے ساتھ تاریخ کا سب سے گھناؤنا مذاق کیااس کی عدالتی انکوائری نہ ہوئی تو سب کچھ اسی طرح چلتا رہے گا۔اس ملک کے معمار میرٹ کی بنیاد پر تعلیم حاصل کرکے آگے بڑھنا چاہتے ہیں مگر حکمران اپنے رشتے داروں کو صوبائی محکموں میں آگے لانے کے لیے ہونہار طالب علموں کو جان بوجھ کر فیل کردیتی ہے ۔ اندرون سندھ کو پیپلزپارٹی نے دہشت گردوں کی آماجگاہ بناڈالا ہے چھوٹو گنگ پنجاب میں ہیں تو بڑو گینگ سندھ میں ملینگے ، آئے روزقتل وغارت گری اور اغوابرائے تاوان کی وارداتوں سے نمٹنے کے لیے اندرون سندھ میں بھی آپریشن کرنے کی ضرورت ہے ، حکمرانوں کے کتے بھی لاکھوں روپے ماہانہ میں پلتے ہیں جبک اس قوم کو دووقت کی روٹی بھی میسر نہیں ہے ،پورے ملک میں ہسپتالوں اور تعلیمی اداروں کی حالت زار ابتر ہے اس پر یہ ہی غریب آدمی بھتہ خوری،راہزنی اورسٹریٹ کرائم سے لٹ رہاہے ،تحریک انصاف دہشت گرد جماعتوں کے خاتمہ کرکے کراچی کی روشنیاں لوٹاچاہتی ہے ،کراچی میں دہشت گردی کو سیاسی مقاصد کے لیے استعمال کیا گیا۔جب جب سیکورٹی اداروں نے اپنا کردار ادا کیا حکمران اس محنت پر پانی پھیرتے رہے ۔ ان خیالات کااظہارانہوں نے فلاحی تنظیم سیو ایجوکیشن سیو سندھ کے تحت سندھ بھر میں ہونے والے کاپی کلچر کے خلاف کراچی پرس کلب کے باہر مظاہرے سے خطاب میں کیا، مظاہر ے میں اساتذہ ،طلباء اور سول سوسائٹی کے لوگ بڑی تعداد موجود تھے۔ جن میں سینئر صحافی عاجز جمالی ،لیاقت میرانی ،اسحاق سومرو ،عبدالجبارکنبھر،عطامحمدکنبھر،ابراہیم کیریو،رفیق چاکرانی بھی موجود تھے جنھوں نے مظاہرین سے خطاب کیا۔حلیم عادل شیخ نے کہا ہے کہ ہم نے ہمیشہ دہشت گردی کے خاتمے لیے قانون نافز کرنے والے اداروں کا ساتھ دیاہے اس وقت پنجاب میں ضرب آہن اور چھوٹو گینگ کا بہت شور ہے اور کہا یہ جارہاہے کہ چھوٹو گینگ کے ساتھ چھپنے کے لیے اندرون سندھ کا رخ کررہے ہیں لہذا ان کاخاتمہ تو بہت ضروری ہے مگر اس طرح کی گفتگو پیپلزپارٹی والے نہ ہی کریں تو اچھا ہے کیونکہ سندھ میں بھی چھوٹو گینگ سے کم حیثیت کے ڈاکو نہیں رہتے بلکہ سندھ میں بیٹھے ڈاکووں کواسمبلی میں بیٹھے لوگوں کی مکمل آشیر باد ہے ۔حلیم عادل شیخ نے کہا کہ حکومت نے ایک دن بھی ملکی ترقی کے لیے عوام سے مشورہ نہیں مانگا ہے ہم ایسا نہیں کرینگے اس ملک کی تمام ترقی میں قوم کے نوجوانوں کو شامل کیا جائے گا۔کیونکہ ہم اچھی طرح جانتے ہیں کہ اس ملک کو ترقی کے نام پر بہت بے وقوف بنایاگیا ہے مگر عمران خان اپنے دور حکومت میں دل کھول کر عوام کی خدمت کرینگے ۔