اسلام آباد(نیوز ڈیسک) پی سی بی کی طرف سے قومی ٹیم کے کپتان شاہد خان آفریدی پر ٹیم کی خراب صورتحال کی ذمے داری عائد کر نے کے بعد ملا جلا رد عمل سامنے آ رہا ہے ۔ کرکٹ ٹیم کے سابق کپتان رمیض راجہ نے کہا ہے کہ کپتان ذمے دار تو ضرور ہیں مگر انتخاب عالم کی رپورٹ پاکستانی ٹیم کی اصل حالت کا مجموعی احاطہ کر رہی ہے۔ ان کا کہنا تھا کہ انتخاب عالم نے اپنی رپورٹ میں جو کچھ کہا ہے اور جو کچھ اسے پہلے سامنے آ چکا ہے اس سے سبق سیکھتے ہوئے ہمیں بہتری کی جانب بڑھنا چاہئے اور امید ہے کہ ایسا ہی ہو گا اور مستقبل میں یہ غلطیاں نہیں دہرائی جائیں گی۔
پاکستانی باﺅلنگ سے متعلق گفتگو کرتے ہوئے رمیز راجہ کا کہنا تھا کہ پاکستان کو دفاعی باﺅلنگ کی جانب توجہ دینا ہو گی کیونکہ پاکستان اس میں بہت کمزور ہے، باﺅلرز اگر 4 اوورز اچھے کر لیتے ہیں تو 12 اوورز میں ان کی دھنائی ہو جاتی ہے۔ بیٹنگ سے متعلق گفتگو کرتے ہوئے رمیز راجہ نے کہا ہے کہ کسی بھی طرح سے بیٹنگ میں ایمرجنسی نافذ کرنا پڑے گی اور اس پر بہت کام کرنا ہو گا، سننے میں آ رہا ہے کہ ٹیم کا کوچ ایک بار پھر باﺅلر کو بنایا جا رہا ہے حالانکہ ہمیں بیٹنگ جینئیس کی ضرورت ہے جو آپ کی بلے بازی کو ٹھیک کر سکے۔