لاہور(نیوز ڈیسک) ویسٹ انڈیز کے کپتان ڈیرن سیمی نے خیبرپختونخوا کی ثقافت،روایات اورخواتین کو خراج تحسین پیش کرتے ہوئے خیبر پختونخوا کی خواتین کو یورپین خواتین سے ہزار درجے بہتر قرار دیتے ہوئے ٹویٹر پر اپنے جذبات کا اظہار کرتے ہوئے پشتو زبان میں ایک ٹویٹ میں کہا ہے کہ ”میں خیبر کی عام سی لڑکی کیلئے یورپ کی خوبصورت لڑکیاں قربان کرنے کو تیار ہوں“۔ واضح رہے کہ پاکستان سپر لیگ میں پشاور زلمی کا حصہ بننے والے ڈیرن سیمی نے پشتو سیکھنے میں دلچسپی لینا شروع کر دی تھی۔ انہوں نے کہا تھا کہ مجھے خوشی ہے کہ یہاں کرکٹ کے علاوہ مجھے پاکستان کے کلچر کو قریب سے دیکھنے کا موقع ملے گا۔ یہاں تو میں اپنی پشتو بہتر بنا رہا ہوں۔ یہاں کے لوگوں میں گھلنا ملنا بہت ہی اچھا لگ رہا ہے۔ اس سے قبل ایک بیان میں ڈیرین سیمی نے پاکستانی شائقین کی کرکٹ سے محرومی پر افسوس کا اظہار کیا تھا۔ ڈیرن سیمی کا کہنا تھا کہ ان کے لیے یہ بات پریشان کن ہے کہ پاکستانی شائقینِ انٹرنیشنل کرکٹ سے دور ہیں اور وہ غیر ملکی کھلاڑیوں کو اپنے ملک کے میدانوں میں پرفارم کرتا ہوا دیکھنے سے قاصر ہیں۔ سیمی نے کہا تھا کہ وہ یہ خواہش رکھتے ہیں کہ جب کوئی بڑی پرفارمنس وہ دیں تو ان کے ہوم گراو¿نڈ میں بیٹھے شائقین اس سے لطف اٹھا سکیں۔ ان کے خیال میں اِس تناظر میں پاکستانی کرکٹرز بھی اِس سے محروم ہیں کہ وہ اپنے لوگوں اور عوام کے سامنے بڑی کارکردگیوں کے وقت داد و تحسین وصول کرنے سے محروم رہ رہے ہیں۔