اسلام آباد (نیوز ڈیسک )اسلام آباد میں تقریب سے خطاب کرتے ہوئے صدر ممنون حسین کا کہنا تھا کہ تعلیمی سرگرمیوں کے فروغ کیلئے تعلیمی اداروں سے تعاون جاری رہے گا۔ نوجوان پاکستان کا مستقبل محفوظ بنانے میں کردار ادا کریں۔ پاکستان بھی ترقی کی دوڑ میں شامل ہوگا۔ انکا کہنا تھا کہ ماضی میں توانائی اور صحت کے شعبے میں منصوبے شروع نہیں کئے گئے۔ امید ہیں دوہزار اٹھارہ تک توانائی کے شعبے میں شروع کئے گئے منصوبے مکمل ہوجائیں گے۔صدر مملکت کا کہنا تھا کہ گوادر میں پاکستان کا سب سے بڑا فضائی اڈا تعمیر کیا جائے گا۔ اقتصادی راہداری منصوبہ پاکستان کی ترقی کا ضامن ہوگا۔ حکومت ملک کو درست سمت میں لے جاری ہے۔ عوام حکومت کا ساتھ دیں اور بدعنوان عناصر سے قطع تعلق کرلیں۔ انکا کہنا تھا کہ اسلام کسی قسم کے انتشار کی اجازت نہیں دیتا۔ اسلام کی تعلیمات امن اور سلامتی کی ضامن ہیں۔ صدر ممنون حسین کا کہنا تھا کہ دہشتگردوں کیخلاف نیشنل ایکشن پلان کے تحت کارروائیوں کا سلسلہ جاری ہے۔ ملک کو محفوظ بنانے میں کوئی کسر نہیں چھوڑیں گے۔