ممبئی (نیوز ڈیسک)ویسٹ انڈیز کے کرکٹر اورٹی ٹوئنٹی کے سپر سٹار کرس گیل نے بھارت اور ویسٹ انڈیز کے خلاف سیمی فائنل سے قبل بالی وڈ کے سپر سٹار امیتابھ بچن سے ممبئی میں ان کے گھر پر ملاقات کی ہے۔ملاقات کے بعد دونوں نے ایک دوسرے کی خوب تعریف کی۔امیتابھ اور گیل نے ملاقات کی تصاویر فیس بک، ٹویٹر اور انسٹاگرام پر بھی جاری کیں۔اپنے فیس بک صفحے پر امیتابھ نے لکھا کہ کرس گیل مجھ سے ملنے گھر آئے۔ مجھے پتہ نہیں تھا کہ وہ میرے فین ہیں ،وہ بے حد شائستگی سے پیش آئے۔ امید ہے کہ جمعرات کو بھارت کے ساتھ ہونے والے ورلڈ ٹی ٹوئنٹی کے سیمی فائنل میں بھی وہ ہماری ٹیم کے ساتھ اسی عاجزی سے پیش آئیں گے۔کرس گیل نے ٹوئٹر پر لکھا کہ امیتابھ بچن کتنی پرکشش شخصیت کے مالک ہیں وہ عظیم شخص ہیں۔انھوں نے لکھاکہ مجھے دعوت دینے کیلئے اور مہمان نوازی کیلئے میں ان کا بہت بہت شکر گزار ہوں۔ کتاب کیلئے بھی شکریہ۔ امیتابھ بچن چاہتے ہیں کہ میں بھارت کے خلاف سنچری بناؤں مگر بھارت جیتے لیکن میں اپنی سنچری کے بدلے جیت حاصل کرنا چاہوں گا۔