اسلام آباد (نیوز ڈیسک) راولپنڈی انسٹی ٹیوٹ برائے امراض قلب نے یوم پاکستان کو اپنی سرکاری تعطیل سے صرف نظر کرتے ہوئے اس دن کو بارہ ایسے مریضوں کے لئے مخصوص کردیا جن کے دل کی شریانیں سو فیصد تک بند تھیں ان مریضوں کی ایک سے زیادہ شریانوں میں سی ٹی اوکا عارضہ پایا جاتا تھا۔ اس قابل تعریف اور منفرد آپریشن کی نگرانی انسٹی ٹیوٹ کے سربراہ پروفیسر کارڈیالوجی ڈاکٹر میجر جنرل اظہر محمود کیانی نے کی جبکہ نیوکاسل فری مین یونیورسٹی اسپتال برطانیہ سے آئے ڈاکٹر ایگررڈ نے خصوصی آلات کی مدد سے اس پیچیدہ عمل کو انجام دیا۔ڈاکٹر ایگررڈ ایک بین الاقوامی کانفرنس میں شرکت کے لئے پاکستان آئے ہیں جن سے یہ خدمات بلا معاوضہ حاصل کی گئیں وہ شام کے رہنے والے اور مسلمان معالج ہیں۔آپریشن بدھ کو صبح آٹھ بجے شروع کئے گئے اور سہ پہر اڑھائی بجے تک جاری رہے۔