کلکتہ (نیوز ڈیسک) آسٹریلیوی اوپنر ڈیوڈ وارنر کا کہنا ہے کہ پاکستانی فاسٹ باؤلر محمد عامر ان کے لیے دیگر باؤلرز کی طرح ہیں ،انہیں ان کے ماضی سے کوئی فرق نہیں پڑتا ہے۔میڈیا سے گفتگو میں ڈیوڈ وارنر کا کہنا تھا کہ محمد عامر ان کے لیے دیگر باؤلرز کی طرح ہی ہیں اور وہ یا دیگر آسٹریلوی کھلاڑی میدان میں عامر کو انکے ماضی کی غلطیاں یاد دلانے کی کوشش نہیں کریں گے ، پاکستانی کرکٹ بورڈ اور آئی سی سی نے عامر کو انٹر نیشنل کرکٹ کھیلنے کی اجازت دی ہے اور پاکستانی کھلاڑیوں نے بھی انہیں قبو ل کر لیا ہے جس کے بعد اب اس پر بحث کی کوئی گنجائش باقی نہیں رہ گئی ہے۔کینگرو اوپنر کا مزید کہنا تھا کہ 2010ء4 میں ویسٹ انڈیز میں کھیلے گئے ورلڈ ٹی ٹونٹی کے سیمی فائنل میں عامر نے آسٹریلیوی اننگز کی پہلی یا دوسری گیند پر انہیں آؤٹ کیا تھا اور تب بھی وہ 150کلومیٹر فی گھنٹہ کی رفتار سے گیندیں کرا رہے تھے۔ یاد رہے کہ پاکستان اور آسٹریلیا کی ٹیمیں جمعے کی رات موہالی کے میدان پر ہی ورلڈ ٹی ٹونٹی کے سیمی فائنل تک رسائی کی اپنی امیدیں برقرار رکھنے کے لیے آمنے سامنے آئیں گی۔