لاہور (نیوز ڈیسک) سوئی ناردرن گیس پائپ لائنز کے منیجنگ ڈائریکٹر امجد لطیف نے کہا ہے کہ ایل این جی کی درآمد کے بعد گیس کی قلت ختم ہوگئی ہے اورآٹھ سال بعد پنجاب اورکے پی کے میں صنعتی شعبوں کیلئے گیس کی لوڈشیڈنگ ختم کر دی گئی ہے ، پاورسیکٹر کو گیس ملنے سے بجلی کی لوڈشیڈنگ بھی کم ہوجائےگی ۔نجی ٹی وی سے گفتگو کرتے ہوئے ایم ڈی سوئی ناردرن امجد لطیف نے کہا کہ روزانہ 500ملین کیوبک فٹ درآمدی مائع گیس سسٹم میں شامل ہورہی ہے جس سے پاور ،سی این جی ،کھاد سیمنٹ اور جنرل انڈسٹری کو 24گھنٹے گیس فراہمی ممکن ہوگئی ہے۔گیس لوڈشیڈنگ آٹھ سال بعدختم ہوئی ہے اور مرحلہ وار 1200ملین کیوبک فٹ ایل این جی آنے سے لوڈشیڈنگ پر مستقل قابو پا لیں گے۔امجد لطیف نے بتایا کہ کمرشل اور صنعتی کنکشنوں پر دس سال سے عائد پابندی اٹھانے کے لئے سمری بھی بھجوا دی ہے ۔