میرپور(نیوزڈیسک) قومی ٹیم کے سابق کپتان جاوید میانداد کا کہنا ہے کہ ان کے دور میں بھارتی کرکٹ ٹیم نے ہار کے ڈر سے پاکستان سے کھیلنا ہی چھوڑ دیا تھا۔ میڈیا سے گفتگو میں جاوید میانداد کاکہناتھا کہ ان کے دور میں بھارت نے پاکستان کے ہاتھوں اتنی شکستیں کھائیں کہ پھر اس کے کھلاڑیوں نے ہمارے ساتھ کھیلنا ہی چھوڑ دیا ،یہ دیکھ کر پھر ہم نے ان سے دو ، چار میچز ہارنا شروع کیے کہ شاید اس طریقے سے یہ لوگ ہمارے ساتھ سیریز کھیلیں لیکن اب بھی وہ تیار نہیں ہوتے ہیں۔انہوں نے ہلکے پھلے انداز میں کہا کہ بھارتیو ں کے لیے ایک ہی بندہ کافی ہے جو وہ خود ہیں ،اگر انہوں نے زیادہ جوش دلایا تو پھر پیڈ پہن کر بلا ہاتھ میں لیے میدان میں اتر آئیں گے اوربھارت کی کرکٹ ایک بار پھر 20سال پیچھے چلی جائے گی۔