لندن(نیوز ڈیسک) انگلش کاؤنٹی سسیکس کیلئے کھیلنے والے ابھرتے ہوئے انگلش فاسٹ باؤلر میتھیو ہوبڈن 22 سال کی عمر میں انتقال کر گئے۔ہوبڈن نے سسیکس کیلئے اپنا فرسٹ کلاس ڈیبیو 2014 میں کیا تھا، گزشتہ تین سیزن سے وہ کاؤنٹی کی تمام طرز کی کرکٹ میں نمائندگی کرتے آ رہے تھے اور اگست میں سسیکس کیلئے آخری میچ کھیلا تھا۔ان کی موت کی وجوہات کا اب تک اعلان نہیں کیا گیا لیکن ذرائع کے مطابق ان کی موت اسکاٹ لینڈ میں اچانک واقع ہوئی۔انگلش کرکٹ بورڈ کے فاسٹ باؤلنگ کوچ کیون شائن نے کہا کہ میٹ بے پناہ صلاحیت کا حامل نوجوان کرکٹر تھا اور ان کی کمی انتہائی شدت محسوس ہو گی۔ہوبڈن انگلینڈ کی قومی ٹیم کیلئے کھیلنے کے خواہشمند تھے اور حال ہی انہیں انگلینڈ کے پرفارمنس پروگرام میں شامل چھ کھلاڑیوں کی فہرست کا حصہ بنایا گیا تھا۔ان کی موت کے سوگ میں انگلینڈ کے کھلاڑی آج جنوبی افریقہ کے خلاف کیپ ٹاؤن میں جاری ٹیسٹ میچ میں سیاہ پٹیاں بازو پر باندھ کر میدان میں اتریں گے۔سسیکس نے اپنے بیان میں کہا کہ سسیکس کرکٹ اس سانحے پر بہت شاک اور میتھیو ہوبڈن کے گزرنے کی خبر پر بہت افسردہ ہے۔ہوبڈن کی موت پر انگلش ایک روزہ ٹیم کے کپتان آئن مورگن سمیت متعدد انگلش کھلاڑیوں نے ٹوئٹر پر پیغامات میں ان کی موت پر اظہار افسوس اور اہلخانہ سے دل کی گہرائیوں سے تعزیت کی۔