راولپنڈی(نیوز ڈیسک)سابق صدر پاکستان آصف زرداری کو ایس جی ایس اور کوٹیکنا ریفرنسز کیس میں احتساب عدالت نے بری کر دیا۔ آصف زرداری پر غیر ملکی کمپنی کو پری شپمنٹ ٹھیکا دینے میں کمیشن وصولی کا الزام ہے۔ کمیشن وصولی کا الزام بے نظیر بھٹو کے دور حکومت میں لگایا گیا تھا۔ احتساب عدالت کے جج محمد بشیر نے فیصلہ گیارہ نومبر کو محفوظ کیا تھا۔ فاروق ایچ نائیک نے مقدمہ جیتنے کے بعد میڈیا سے گفتگو کرتے ہوئے کہا آج حق سچ کی فتح ہوئی ہے۔ آصف زرداری نے آٹھ سال جیل کاٹی، تین ریفرنسز میں بری ہو چکے ہیں۔ نیب کے پاس ریفرنسز کی اصل دستاویزات موجود نہیں ہیں۔ بے نظیر کا نام پہلے ہی ان کی شہادت کی وجہ سے خارج کیا جا چکا ہے۔ شریک ملزم سابق چیئرمین سی بی آر اے آر صدیقی کو عدالت عدم ثبوت پر پہلے ہی بری کر چکی ہے۔ فاروق ایچ نائیک نے کہا سیاسی بنیادوں پر یہ کیسز بنوائے گئے تھے۔ سیف الرحمن نے سیاسی انتقام کے لئے یہ کیسز بنوائے تھے۔ انہوں نے کہا مقدمات بنوانے والوں سے سوال ہے کہ مقدمے بنانے کا کیا فائدہ ہوا۔