اسلام آباد(نیوز ڈیسک) پاکستان تحریک انصاف نے جاری لانگ مارچ کے آئندہ مرحلے کا پروگرام تبدیل کرتے ہوئے نیا شیڈول جاری کردیا ہے،
جس کے تحت مارچ مختلف اضلاع سے ہوتا ہوا صوابی پہنچے گا۔پی ٹی آئی کے جنرل سیکریٹری علی اصغر خان کے مطابق وزیراعلیٰ خیبر پختونخوا محمد سہیل آفریدی آئندہ مرحلے کے دوران مختلف اضلاع میں لانگ مارچ کی قیادت کریں گے۔ ان کا کہنا تھا کہ مارچ کا قافلہ آج رات ضلع خیبر سے روانہ ہوکر پشاور پہنچے گا۔پارٹی کے نئے پروگرام کے مطابق لانگ مارچ 9 اکتوبر کو چارسدہ، 10 اکتوبر کو مردان جبکہ 11 اکتوبر کو صوابی پہنچے گا۔پی ٹی آئی کے مطابق مارچ کے دوران مختلف اضلاع کے کارکن بھی قافلے کا حصہ بنتے جائیں گے،
جبکہ وزیراعلیٰ خیبر پختونخوا بھی مارچ کے ساتھ موجود رہیں گے اور مختلف مقامات پر قیادت کریں گے۔پارٹی قیادت کا کہنا ہے کہ صوابی پہنچنے کے بعد مرکزی رہنماؤں کی مشاورت سے لانگ مارچ کے مستقبل کا فیصلہ کیا جائے گا اور آئندہ کے لائحہ عمل کا اعلان اسی موقع پر متوقع ہے۔
