اسلام آباد (نیوز ڈیسک): وزیراعظم کی پیٹرول سبسڈی اسکیم سے فائدہ اٹھانے والے شہریوں کے لیے پیٹرول پمپ اونرز ایسوسی ایشن نے طریقہ کار واضح کردیا ہے۔
ایسوسی ایشن کے مطابق رعایتی نرخوں پر پیٹرول صرف ان گاڑیوں کو فراہم کیا جائے گا جن کا ٹوکن سسٹم میں پہلے سے جنریٹ ہوچکا ہو۔
آل پاکستان پیٹرول پمپ اونرز ایسوسی ایشن کا کہنا ہے کہ سبسڈی کے لیے گاڑی کی باقاعدہ رجسٹریشن بھی ضروری ہے۔ غیر رجسٹرڈ گاڑیوں کے مالکان کو اسکیم کے تحت سستا پیٹرول فراہم نہیں کیا جائے گا۔
ایسوسی ایشن کے رہنما نعمان علی بٹ کے مطابق حکومتی ہدایات میں واضح کیا گیا ہے کہ سبسڈی کی سہولت اسی صارف کو حاصل ہوگی جس کی گاڑی اس کے نام پر رجسٹرڈ ہو اور متعلقہ نظام میں اس کا ٹوکن بھی جاری ہوچکا ہو۔
انہوں نے بتایا کہ پیٹرول پمپ پر موجود عملہ سسٹم میں ٹوکن کی تصدیق کے بعد ہی متعلقہ گاڑی کو رعایتی پیٹرول فراہم کرے گا۔ کسی ایک گاڑی کے لیے جاری ہونے والے ٹوکن کی بنیاد پر دوسری گاڑی کو سبسڈی والا پیٹرول دینا قابل قبول نہیں ہوگا۔
ایسوسی ایشن نے شہریوں کو ہدایت کی ہے کہ وہ اسکیم سے فائدہ اٹھانے سے قبل گاڑی کی رجسٹریشن اور ٹوکن کا ریکارڈ چیک کرلیں۔ حکام کے مطابق درست معلومات اور فعال ٹوکن کی موجودگی سے رعایتی پیٹرول کے حصول کے دوران ممکنہ مشکلات سے بچا جاسکتا ہے۔
