کراچی(این این آئی)اداکارہ حرا مانی ایک بار پھر اپنے نئے فوٹوشوٹ کے باعث سوشل میڈیا صارفین کی توجہ کا مرکز بن گئیں
تاہم اس بار ان کے انداز کو پسند کیے جانے کے بجائے بعض صارفین کی جانب سے تنقید کا سامنا کرنا پڑ رہا ہے۔حرا مانی نے شوبز کیریئر کا آغاز میزبانی سے کیا، بعد ازاں ڈرامہ انڈسٹری میں قدم رکھا اور متعدد مقبول ڈراموں میں اداکاری کے ذریعے اپنی شناخت بنائی۔ وقت کے ساتھ اداکارہ کے فیشن اور طرزِ انتخاب میں بھی نمایاں تبدیلی دیکھنے میں آئی ہے۔حال ہی میں حرا مانی نے اپنے انسٹاگرام اکاؤنٹ پر نئے فوٹوشوٹ کی تصاویر شیئر کیں، جن میں وہ مختلف انداز میں دکھائی دے رہی ہیں۔ تصاویر میں اداکارہ نے گھٹنوں تک آنے والا لباس زیب تن کیا جبکہ میک اپ نسبتاً سادہ رکھا گیا ہے، جب کہ انہوں نے اپنے بال بھی مختصر انداز میں کٹوائے ہیں۔فوٹوشوٹ کی بعض تصاویر میں اداکارہ نے قدرے جرات مندانہ انداز اختیار کیا، جس کے بعد تصاویر سوشل میڈیا پر تیزی سے گردش کرنے لگیں۔تصاویر پر صارفین کی جانب سے ملا جلا ردعمل سامنے آیا۔
بعض صارفین نے حرا مانی کے نئے انداز کو پسند کیا، تاہم کئی صارفین نے ان کے لباس اور فیشن انتخاب کو تنقید کا نشانہ بناتے ہوئے اسے نامناسب قرار دیا۔سوشل میڈیا صارفین کی جانب سے اداکارہ کے موجودہ فیشن انداز کا ان کے ماضی کے انداز سے تقابل بھی کیا گیا اور بعض نے شوبز میں آنے کے بعد ان کے طرزِ لباس میں ہونے والی تبدیلی پر تبصرے کیے۔حرا مانی کی جانب سے سوشل میڈیا پر ہونے والی تنقید کے حوالے سے تاحال کوئی وضاحت یا ردعمل سامنے نہیں آیا، تاہم ان کا نیا فوٹوشوٹ سوشل میڈیا پر بحث کا موضوع بنا ہوا ہے۔
