اسلام آباد (نیوز ڈیسک) بھارت میں ایک افسوسناک واقعے کے دوران پہاڑی سے گرنے والے نوجوان کو بچانے کی کوشش میں اس کے والدین بھی جان کی بازی ہار گئے۔
واقعے نے علاقے میں غم کی فضا پیدا کردی جبکہ موقع پر موجود افراد بھی اس المناک منظر کو دیکھ کر پریشان ہوگئے۔رپورٹس کے مطابق نوجوان پہاڑی کے خطرناک کنارے کے قریب موجود تھا اور مسلسل وہاں حرکت کر رہا تھا۔ فائر بریگیڈ کے اہلکاروں نے اسے محفوظ رکھنے کے لیے پہاڑی کے نیچے حفاظتی جال بچھانے کی کوشش بھی کی، تاہم نوجوان کنارے سے پیچھے ہٹنے کے بجائے وہیں موجود رہا۔دوپہر کے قریب تقریباً ایک بجے نوجوان کے والد اسے بچانے کے لیے پہاڑی پر پہنچے۔ انہوں نے بیٹے کو پکڑنے کی کوشش کی، لیکن اسی دوران نوجوان کا پاؤں پھسل گیا اور وہ پہاڑی سے نیچے جا گرا۔ بیٹے کو بچانے کی کوشش میں والد بھی اپنا توازن برقرار نہ رکھ سکے اور وہ بھی گہرائی میں جا گرے۔
واقعے کے چند لمحوں بعد نوجوان کی والدہ نے اپنے شوہر اور بیٹے کو پہاڑی سے گرتے دیکھا تو وہ بھی بے قابو ہو کر پہاڑی سے کود گئیں، جس کے نتیجے میں وہ بھی جانبر نہ ہوسکیں۔پولیس کے مطابق تینوں افراد کی موت موقع پر ہی ہوگئی۔ حکام نے لاشوں کو اپنی تحویل میں لے کر ضروری قانونی کارروائی کے لیے اسپتال منتقل کردیا۔عینی شاہدین کا کہنا ہے کہ والدہ آخری وقت تک اپنے بیٹے کو پہاڑی کے کنارے سے دور رہنے اور پیچھے ہٹنے کے لیے کہتی رہیں، تاہم وہ اسے بچانے میں کامیاب نہ ہوسکیں۔مقامی رپورٹس کے مطابق متاثرہ خاندان چھترپتی سمبھاجی نگر کے زلتا پھاٹا علاقے میں رہائش پذیر تھا۔ واقعے کے بعض مناظر وہاں موجود لوگوں نے اپنے موبائل فون کیمروں میں بھی محفوظ کرلیے۔
