اسلام آباد (نیوزڈیسک)کیا آپ یقین کریں گے کہ فیس بک پر روزانہ لاگ ان ہونے والے صارفین کی تعداد اوسطاً ایک ارب سے تجاوز کرچکی ہے؟جی ہاں واقعی اس بات کا اعلان فیس بک کی جانب سے تیسری سہ ماہی کے اعدادوشمار جاری کرتے ہوئے کیا گیا جس کے مطابق ماہ ستمبر میں روزانہ اوسطاً 1.1 ارب افراد فیس بک پر لاگ ان ہوئے جو گزشتہ سال کے اسی عرصے کے مقابلے میں 17 فیصد زیادہ تعداد ہے۔ان صارفین میں 90 کروڑ کے قریب موبائل فون استعمال کرنے والے شامل تھے جبکہ ماہانہ سماجی رابطے کی اس ویب سائٹ کو استعمال کرنے والوں کی تعداد ایک ارب 55 کروڑ رہی یعنی گزشتہ سال کے مقابلے میں چودہ فیصد زیادہ۔اسی طرح فیس بک پر ویڈیوز دیکھنے والوں کی تعداد میں حیران کن اضافہ ہوا ہے۔اعدادوشمار کے مطابق اپریل 2015 میں روزانہ فیس بک پر چار ارب ویڈیوز دیکھی جاتی تھی مگر اب یہ تعداد 8 ارب تک جاپہنچی ہے۔فیس بک ہر اس ویڈیو کو ان اعدادوشمار میں شامل کرتا ہے جسے کسی نے کم از کم تین سیکنڈز تک دیکھا ہو۔
دلچسپ بات یہ ہے کہ صرف پانچ سو ملین افراد ہی روزانہ فیس بک کے پلیٹ فارم پر ویڈیوز کو دیکھتے ہیں یعنی اوسطاً فی فرد 16 ویڈیوز۔
فیس بک کے پانچ کروڑ صارفین فیس بک لائٹ ایپ استعمال کرتے ہیں جو سست رفتار انٹرنیٹ پر کام کرنے کے لیے بنائی جانے والی اپلیکشن ہے۔فیس بک کی اپلیکشن واٹس ایپ کے صارفین کی تعداد 90 کروڑ سے زائد ہے جبکہ فیس بک میسنجر پر یہ تعداد 70 کروڑ سے تجاوز کرچکی ہے۔فیس بک کی اپلیکشن انسٹاگرام پر روزانہ 8 کروڑ سے زائد تصاویر شیئر ہوتی ہیں جبکہ فیس بک میسنجر پر ہر ماہ لوگ ساڑھے نو ارب تصاویر شیئر کردیتے ہیں۔
فیس بک میں ایک خوشگوار تبدیلی
حال ہی میں فیس بک استعمال کرنے والے صارفین (سب نہیں) کو ایک دوستانہ خیرمقدم کی شکل میں خوشگوار تبدیلی دیکھنے کو ملی جو پہلے کبھی نظر نہیں آئی تھی۔یہ تبدیلی کچھ ایسی تھی کہ جب فیس بک کے کچھ صارفین لاگ ان ہوتے تو انہیں اپنے نیوز فیڈ پر سب سے اوپر ایک شائستہ پیغام موصول ہوا جس پر کچھ ایسے لکھا تھا ‘ گڈ مارننگ (آگے صارف کا نام)، یہاں آنے کے لیے شکریہ، آج کے لیے فیس بک پر لطف اندوز ہو۔
صارفین کو یہ حیرت انگیز مگر خوشگوار پیغام ڈیسک ٹاپ اور موبائل دونوں جگہ دیکھنے کو ملا۔
اس پیغام کو موصول کرنے والے صارفین پر اس نئے اضافے پر ملے جلے تاثرات کا اظہار کیا جن کو اکثر فیس بک پر ‘ آن دس ڈے’ جیسے فیچرز کے نوٹیفکیشن ہی موصول ہوتے ہیں۔