اسلام آباد (نیوز ڈیسک): وفاقی حکومت نے عوام کو مزید ریلیف دیتے ہوئے پیٹرولیم مصنوعات کی قیمتوں میں نئی کمی کا اعلان کر دیا ہے۔

نئی قیمتوں کا اطلاق 5 اگست سے ہوگا۔

پیٹرولیم ڈویژن کی جانب سے جاری کردہ نوٹیفکیشن کے مطابق پیٹرول کی قیمت میں 3 روپے 39 پیسے فی لیٹر کمی کی گئی ہے، جس کے بعد نئی قیمت 328 روپے 56 پیسے فی لیٹر مقرر کر دی گئی ہے۔

اسی طرح ہائی اسپیڈ ڈیزل بھی 4 روپے 7 پیسے فی لیٹر سستا کر دیا گیا ہے، جس کے بعد اس کی نئی قیمت 385 روپے 86 پیسے فی لیٹر ہو گئی ہے۔

اعلامیے کے مطابق مٹی کے تیل کی قیمت میں بھی 4 روپے 34 پیسے فی لیٹر کی کمی کی گئی ہے، جس کے بعد اس کی نئی سرکاری قیمت 297 روپے 30 پیسے فی لیٹر مقرر کی گئی ہے۔

حکومت کی جانب سے جاری نوٹیفکیشن کے مطابق یہ تمام نئی قیمتیں 5 اگست سے نافذ العمل ہوں گی۔

واضح رہے کہ اس سے قبل بھی حکومت نے پیٹرولیم مصنوعات کی قیمتوں میں کمی کرتے ہوئے پیٹرول کی قیمت میں 4 روپے 8 پیسے جبکہ ڈیزل کی قیمت میں 2 روپے 45 پیسے فی لیٹر کمی کا اعلان کیا تھا۔ حالیہ فیصلے کے بعد مسلسل دوسری مرتبہ پیٹرولیم مصنوعات کی قیمتوں میں کمی سامنے آئی ہے، جس سے صارفین کو کچھ ریلیف ملنے کی توقع ہے۔