جے پور (این این آئی )بھارتی ریاست راجستھان کے علاقے سوائی مادھوپور میں واقع ایک گاں کے سرکاری اسکول میں خاتون ٹیچر نے ہزار روپے غائب ہونے پر مبینہ طور پر طالبات کے کپڑے اتروا کر تلاشی لی جس پر ٹیچر کو معطل کر دیا گیا۔

بھارتی میڈیا کے مطابق خاتون ٹیچر نے اپنے ہزار روپے گم ہو جانے پر 9 ویں اور 11 ویں جماعت کی طالبات کی تلاشی لی اور ان کے کپڑے اتروا دئیے۔انتظامیہ نے بتایا کہ طالبات کے ساتھ نامناسب رویے کے الزامات سامنے آنے کے بعد والدین کی جانب سے احتجاج کیا گیا اور انہوں نے اسکول کا مرکزی گیٹ بند کر دیا۔ محکمہ تعلیم کی تحقیقات کے بعد ہندی کی سینئر ٹیچر سرسوتی مینا کو معطل کر دیا گیا جبکہ اسکول کی پرنسپل کے خلاف بھی تادیبی کارروائی شروع کرنے کا خط جاری کیا گیا ہے۔

دوسری جانب خاتون ٹیچر نے الزامات کی تردید کرتے ہوئے کہا کہ ہزار روپے غائب ہو گئے تھے جس پر طالبات سے پوچھ گچھ کی گئی، انہیں کپڑے اتارنے پر مجبور کرنے کے الزامات بے بنیاد ہیں، ایک خاتون ٹیچر ہونے کی حیثیت سے میں نے صرف طالبات سے پوچھ گچھ کرنا ہی مناسب سمجھا تھا۔