سکھر(نیوزڈیسک)سندھ اور پنجاب کے 20اضلاع میں بلدیاتی انتخابات کیلئے ہونے والی ووٹنگ میں سیاسی رہنماؤں نے بھی حصہ لیا ۔ اپوزیشن لیڈرخورشیدشاہ نے سکھر، وزیراعلیٰ پنجاب نے لاہور اور وزیراعلیٰ سندھ نے خیرپور میں ووٹ کاسٹ کیا۔قومی اسمبلی میں اپوزیشن لیڈرخورشید احمد شاہ نے اپنےآبائی شہر سکھرکی یونین کونسل 2 کے اسلامیہ کالج پولنگ اسٹیشن میں ووٹ کاسٹ کیا۔وزیراعلیٰ پنجاب میاں شہبازشریف نے ماڈل ٹاؤن لاہور میں ووٹ ڈالا۔ اس موقع پر کارکنوں نے پُرجوش نعرے لگائے ۔ وزیراعلیٰ نے ہاتھ ہلا کر نعروں کا جواب دیا۔وزیراعلیٰ سندھ قائم علی شاہ نے خیرپور کے وارڈ نمبر 8 میں ووٹ کاسٹ کیا۔ پیپلزپارٹی کے جیالوں نے نعروں کیساتھ سی ایم سندھ کا استقبال کیا۔پنجاب اسمبلی میں اپوزیشن لیڈر اور تحریک انصاف کے مرکزی رہنما میاں محمودالرشید اور سابق اسپیکر قومی اسمبلی سردار ایاز صادق نے لاہور میں ووٹ کاسٹ کیے۔مسلم لیگ ق کے مرکزی رہنما چودھری پرویز الہٰی نے گورنمنٹ بوائز اسکول نت گجرات میں ووٹ کاسٹ کیا۔ وزیرمملکت پانی و بجلی عابد شیر علی نے اپنا ووٹ فیصل آباد میں ڈالا۔ صوبائی وزیرتعلیم سندھ نثارکھوڑو اور مسلم لیگ ن سندھ کے رہنما ممتازبھٹونے اپنے ووٹ لاڑکانہ میں کاسٹ کیے۔ صوبائی وزیربلدیات سندھ ناصر حسین شاہ نے سکھر میں ووٹ ڈالا۔رہنما پیپلزپارٹی میراعجازخان جاکھرانی نے جیکب آباد اور آغا سراج درانی نے شکار پور میں ووٹ کاسٹ کیے۔