کراچی (نیوزڈیسک) تحریک انصاف کے رہنما چوہدری سرور نے کہا کہ بلدیاتی انتخابات اگر شفا ف ہوئے نتائج ضرور مانیں گے۔وزیر اطلاعات سندھ نثار کھوڑو نے کہا کہ رینجرز کے خلاف اشتہارات کے معاملے کا ملبہ وزارت اطلاعات پر ڈالنے کی کوشش نہ کی جائے۔ایک نجی ٹی وی چینل کے پروگرام میں تحریک انصاف کے رہنما شوکت یوسف زئی اور ایم کیو ایم کے رہنما بیرسٹر سیف نے بھی اظہار خیال کیا۔تحریک انصاف کے رہنما چوہدری سرور نے مزید کہا کہ این اے 122کا ضمنی انتخاب دو سیاسی جماعتوں کے درمیان نہیں تھا، اس ضمنی انتخاب میں ن لیگ کی طرف سے وفاقی اور صوبائی حکومت کے تمام اداروں نے حصہ لیا، این اے 122میں پی ٹی آئی کے ہزاروں لوگوں کے ووٹ حلقہ سے باہر منتقل کیے گئے جبکہ باہر سے ہزاروں ووٹ این اے 122 میں لائے گئے، بلدیاتی انتخابات اگر شفاف ہوئے تو نتائج ضرور مانیں گے ،انتخابات شفاف نہیں ہوئے تو ہمیں یہ کہنے کا حق حاصل ہے کہ انتخابات شفاف نہیں ہوئے، عمران خان کا یہی کہنا ہے کہ این اے 122میں انتخابات والے دن شفاف انتخابات ہوئے لیکن اس سے پہلے پری پول دھاندلی کے ذریعے لوگوں کے ووٹ باہر ٹرانسفر کردیئے گئے تھے، 600سے زائد لوگ اپنے ووٹ کی منتقلی کی شکایت کرچکے ہیں۔