اسلام آباد (نیوز ڈیسک) ریموٹ کنٹرول طیاروں کے شوقین معروف یوٹیوبر ریمی آر سی نے اپنی نئی اور غیرمعمولی تخلیق متعارف کرا دی ہے،
جو دنیا کے بڑے آر سی ماڈلز میں شمار کی جا رہی ہے۔ انہوں نے 8/1 اسکیل پر مبنی ایئربس اے 380 کا دیوہیکل آر سی ماڈل تیار کیا ہے، جس نے شائقین کو حیران کر دیا۔
رپورٹس کے مطابق اس بھاری بھرکم ماڈل طیارے کی باڈی ایک بڑے فوم بلاک کو تراش کر بنائی گئی، جسے بعد میں فائبر گلاس اور کاربن فائبر میٹریل سے مزید مضبوط کیا گیا تاکہ پرواز کے دوران استحکام برقرار رکھا جا سکے۔
طیارے کے پروں کے نیچے نصب چار طاقتور 250 ملی میٹر موٹرز اسے زمین سے اڑانے کی صلاحیت فراہم کرتی ہیں۔ اس آر سی جہاز کا وزن تقریباً 800 پاؤنڈ بتایا جا رہا ہے، جو اسے دنیا کے سب سے بڑے ریموٹ کنٹرول طیاروں میں شامل کرتا ہے۔
ریمی آر سی نے اپنی ویڈیو سیریز میں بتایا کہ اس منصوبے کے دوران سب سے بڑا مسئلہ جہاز کے وزن کو متوازن رکھنا تھا۔ اسی مقصد کے لیے ہلکے مگر انتہائی مضبوط مواد، جیسے ہنی کومب کور کاربن فائبر، کا استعمال کیا گیا، تاہم کامیاب پرواز کے لیے متعدد تجربات اور آزمائشیں بھی کرنا پڑیں۔
دلچسپ امر یہ ہے کہ یہ آر سی ایئربس اے 380 اتنا بڑا ہے کہ ایک بالغ شخص آسانی سے اس کے اندر لیٹ سکتا ہے۔ اس کا حجم بعض چھوٹے کیسنا طرز کے لائٹ ایئرکرافٹ کے برابر قرار دیا جا رہا ہے۔
اگرچہ اس ماڈل کی رفتار سے متعلق تفصیلات سامنے نہیں آئیں، تاہم یہ خصوصیت خاصی متاثر کن سمجھی جا رہی ہے کہ یہ دیوہیکل آر سی طیارہ مکمل سروو پاورڈ لینڈنگ گیئر کے ساتھ حقیقی جیٹ کی طرح رن وے سے ٹیک آف اور لینڈنگ کرنے کی صلاحیت رکھتا ہے۔
