واشنگٹن(نیوز ڈیسک)کیا آپ دیواروں کے پار دیکھ سکتے ہیں ؟ اگر آپ کا جواب نہیں ہے تو جان لیں کہ ہونے والا ہے۔جی ہاں امریکہ کے میساچوسٹس انسٹیٹوٹ آف ٹیکنالوجی اور آرٹیفیشل انٹیلی جنس لیب کے محققین نے وائی فائی سگنلز کی مدد سے دیوار کی دوسری جانب لوگوں کی شناخت کو ممکن بنا دیا ہے۔محققین نے ایسا سافٹ ویئر تیار کیا ہے جو انسانی جسم سے ٹکرانے والے وائی فائی سگنلز کی مدد سے ان کی شناخت کو ممکن بناتا ہے۔آر ایف کیپچر نامی اس سافٹ ویئر میں وائرلیس سگنلز کو بھیجا جاتا ہے اور انسانی جسم کے مختلف حصوں سے ان کے ٹکرا کا تجزیہ کرکے شناخت کی جاتی ہے۔اب تک محققین نے تجربات کے دوران دیوار کی دوسری جانب 15 مختلف افراد کی شناخت 90 فیصد درستگی سے کی اور اس سے کسی فرد کے سانس لینے کے انداز اور دل کی دھڑکن کا تعین بھی کیا جاسکتا ہے۔محققین کا کہنا ہے کہ اس ڈیوائس سے خارج ہونے والی لہریں دیواروں کے پار سے گزر کر اپنی حرکت کے دوران انسانی جسم کے مختلف حصوں کی عکاسی کرتی ہیں اور اس طرح ان کی تصویر بنالی جاتی ہے۔محققین کے مطابق ابھی یہ عام لوگوں کو تو دستیاب نہیں ہوگی تاہم اسے تنہا بزرگ افراد کی دیکھ بھال اور اسمارٹ ہومز میں مختلف اشیاکو کنٹرول کرنے کے حوالے سے استعمال کیا جاسکے گا۔تاہم انہوں نے جاسوسی کے امکانات کو مسترد کرتے ہوئے کہا کہ اس حوالے سے ضروری قوانین مرتب کرکے ان پر عملدرآمد کیا جائے گا۔یہ تحقیق آرٹیفیشل انٹیلی جنس لیبارٹری کی کی ویب سائٹ پر شائع ہوئی ہے اور اسے آئندہ ماہ ایک کانفرنس کے دوران پیش کیا جائے گا۔