اسلام آباد (نیوز ڈیسک) پاکستان تحریک انصاف کے بانی عمران خان کے بیٹے قاسم خان نے دعویٰ کیا ہے کہ ان کے والد کی دائیں آنکھ کی بینائی شدید متاثر ہو چکی ہے اور

مبینہ طور پر اب صرف تقریباً 15 فیصد نظر باقی رہ گئی ہے۔ ان کے مطابق یہ صورتِ حال طویل عرصے تک تنہائی میں قید رکھنے، ضروری طبی معائنوں خصوصاً خون کے ٹیسٹ نہ کروانے دینے اور جیل میں مناسب علاج نہ ملنے کا نتیجہ ہے۔سوشل میڈیا پلیٹ فارم ایکس پر جاری بیان میں قاسم خان نے موجودہ حکومتی انتظامیہ اور متعلقہ حکام پر الزام لگایا کہ عمران خان کی صحت میں بگاڑ ان کی نگرانی میں ہو رہا ہے۔ ان کا کہنا تھا کہ عدالتی نظام کو اس انداز میں استعمال کیا گیا کہ انہیں مسلسل تنہائی میں رکھا جا سکے۔انہوں نے مزید کہا کہ انہیں اور ان کے بھائی کو اپنے والد سے ملاقات کے لیے ویزے جاری نہیں کیے جا رہے، جبکہ دوسری جانب عمران خان کی طبی حالت بگڑ رہی ہے۔ قاسم خان کے مطابق یہ معاملہ تاریخ میں ناانصافی کی مثال کے طور پر یاد رکھا جائے گا۔

انہوں نے انسانی حقوق کی تنظیموں، قانونی اداروں اور جمہوری ممالک سے مطالبہ کیا کہ وہ اس معاملے کا نوٹس لیں اور ان کے بقول ذمہ دار افراد کے خلاف کارروائی کے لیے کردار ادا کریں۔