اسلام آبا د (نیوز ڈیسک )امریکا نے آبنائے ہرمز سے گزرنے والے امریکی پرچم والے بحری جہازوں کے لیے تازہ ہدایات جاری کر دی ہیں،
جن میں انہیں ایرانی علاقائی حدود سے ممکنہ حد تک فاصلہ رکھنے کا کہا گیا ہے۔یہ ایڈوائزری امریکی میری ٹائم ایڈمنسٹریشن کی جانب سے پیر کو جاری کی گئی۔ امریکی حکام کے مطابق نئی ہدایات میں جہازوں کے کپتانوں کو واضح طور پر تاکید کی گئی ہے کہ وہ ایرانی فورسز کو امریکی جہازوں پر سوار ہونے کی اجازت نہ دیں۔ایڈوائزری میں یہ بھی کہا گیا ہے کہ اگر کسی غیر معمولی صورتحال میں ایرانی فورسز جہاز پر چڑھ جائیں تو عملہ کسی قسم کی مزاحمت نہ کرے، تاہم مزاحمت نہ کرنا رضامندی کے مترادف نہیں سمجھا جائے گا۔مزید ہدایات کے مطابق امریکی پرچم بردار تجارتی جہاز آبنائے ہرمز سے گزرتے ہوئے ایران کے علاقائی پانیوں سے زیادہ سے زیادہ دور رہیں، بشرطیکہ جہاز رانی کی سلامتی متاثر نہ ہو۔ مشرق کی سمت سفر کرنے والے جہازوں کو یہ مشورہ بھی دیا گیا ہے کہ وہ عمان کے علاقائی پانیوں کے قریب سے گزرنے کو ترجیح دیں۔
