اسلام آباد (نیوز ڈیسک) حالیہ زلزلے کی بہت زیادہ گہرائی کم نقصان کی بنیادی اور واحد وجہ ہے جبکہ اکتوبر 2005 کے ہولناک زلزلے کا زمین کے اندر فاصلہ کم تھا۔ پاکستان میٹرولوجیکل ڈپارٹمنٹ کے سابق ڈائریکٹر جنرل ڈاکٹر قمر زمان چوہدری نے بتایا کہ زلزلے کی گہرائی جتنی زیادہ ہوگی جانی و مالی نقصانات اتنے کم اور گہرائی جتنی کم ہوگی، نقصانات اتنے زیادہ ہوں گے۔ موجودہ زلزلے کی شدت ریکٹر اسکیل پر 7.7(پی ایم ڈی کے مطابق 8.1) تھی جبکہ گہرائی 196کلومیٹر تھی جبکہ 2005 کے ہلاکت خیز زلزلے کی شدت 7.6مگر گہرائی صرف 10کلومیٹر تھی۔ جنگ رپورٹر طارق بٹ کے مطاق گہرائی زیادہ ہونے کے سبب پیر کے زلزلے میں جانی و مالی نقصان مقابلتاً کم ہوا۔ 8اکتوبر 2005 کے زلزلے میں آزاد کشمیر اور خیبرپختونخوا کے کئی علاقے مکمل تباہ ہوگئے تھے۔ جبکہ بالاکوٹ صفحہ ہستی سے مٹ گیاتھا۔ 70 ہزار افراد جاں بحق ہوئے تھے۔ سابقہ زلزلے کے باعث لوگوں میں خوف و ہراس بہت زیادہ تھا۔ 2005 میں حکومتی ردعمل سست تھا مگر اس بار تیزرفتاری سے ریسکیو کا کام کیا گیا تاہم سرکاری ادارے اور ایجنسیاں معمول کے مطابق کم لیس و کمزور دیکھی گئیں جس سے ظاہر ہوا کہ انہوں نے ماضی سے کوئی سبق نہیں سیکھا۔