اسلام آباد (نیوز ڈیسک) برطانیہ میں ایک حیران کن واقعہ پیش آیا جہاں ایک مسافر طیارہ تقریباً 35 افراد کو ایئرپورٹ پر چھوڑ کر بغیر ان کے روانہ ہو گیا۔ غیر ملکی خبر رساں ادارے کے مطابق فلائٹ ایل ایس 879 مانچسٹر سے اسپین کے لیے روانہ ہونا تھی۔تفصیلات کے مطابق اسپین کے ساحلی علاقوں میں تعطیلات گزارنے کے خواہشمند مسافروں نے بورڈنگ پاس دکھانے کے بعد طیارے کی جانب جانے کی کوشش کی، تاہم جب وہ مقررہ مقام پر پہنچے تو وہاں جہاز کے بجائے بند راستہ موجود تھا۔ مسافروں کو یہ دیکھ کر شدید حیرت ہوئی کہ طیارہ موجود ہی نہیں تھا۔

متاثرہ مسافروں کا کہنا ہے کہ وہ تقریباً 40 منٹ تک ایئرپورٹ پر ادھر اُدھر بھٹکتے رہے اور اس انتظار میں رہے کہ شاید عملے کا کوئی رکن دروازہ کھول دے یا انہیں کسی شٹل سروس کے ذریعے طیارے تک پہنچایا جائے، مگر ایسا کچھ نہ ہوا۔ایک مسافر کے مطابق جب طویل انتظار کے بعد انہوں نے واپس جا کر معلومات حاصل کیں تو انہیں بتایا گیا کہ طیارہ پہلے ہی ان کے بغیر پرواز کر چکا ہے۔ دوسری جانب ایئرلائن انتظامیہ نے واقعے کی تصدیق کرتے ہوئے کہا ہے کہ اس معاملے کی مکمل تحقیقات کی جا رہی ہیں تاکہ ذمہ داری کا تعین کیا جا سکے۔