اسلام آباد (نیوز ڈیسک) بھارت کی ریاست تلنگانہ میں بچوں کے استعمال کے لیے بنائے جانے والے آلمونٹ-کِڈ سیرپ پر فوری طور پر پابندی نافذ کر دی گئی ہے۔ یہ اقدام اس وقت کیا گیا جب دوا میں ایک مضرِ صحت کیمیکل پائے جانے کی تصدیق ہوئی۔
رپورٹس کے مطابق سیرپ میں ایتھیلین گلائکول نامی خطرناک مادہ موجود ہے، جو انسانی صحت کے لیے نہایت نقصان دہ، خصوصاً بچوں کے لیے انتہائی زہریلا سمجھا جاتا ہے۔ اس انکشاف کے بعد دوا کے استعمال پر سنگین خدشات ظاہر کیے گئے ہیں۔
بھارتی ذرائع ابلاغ کا کہنا ہے کہ کولکتہ میں قائم سینٹرل ڈرگس اسٹینڈرڈ کنٹرول آرگنائزیشن (سی ڈی ایس سی او) نے اس حوالے سے باضابطہ الرٹ جاری کیا، جس کے بعد تلنگانہ ڈرگس کنٹرول انتظامیہ نے فوری ردعمل دیتے ہوئے انتباہی نوٹس نافذ کر دیا۔
محکمہ صحت نے عوام کو ہدایت دی ہے کہ اگر کسی کے پاس آلمونٹ-کِڈ سیرپ موجود ہو تو اس کا استعمال اور فروخت فوراً روک دی جائے۔ چونکہ یہ دوا بچوں کے لیے تیار کی گئی تھی، اس لیے والدین، فارماسسٹس اور طبی مراکز کو خصوصی احتیاط برتنے کی تاکید کی گئی ہے۔
حکام نے واضح کیا ہے کہ اس سیرپ کی موجودگی کی صورت میں فوری طور پر استعمال بند کر کے قریبی ڈرگس کنٹرول اتھارٹی کو آگاہ کیا جائے۔ اس کے ساتھ ہی ریاست بھر کے ڈرگس انسپکٹرز اور اسسٹنٹ ڈائریکٹرز کو ہدایت دی گئی ہے کہ متاثرہ بیچ کا تمام اسٹاک ضبط کیا جائے۔
مزید برآں ریٹیلرز، ڈسٹری بیوٹرز، تاجروں اور اسپتالوں کو سختی سے ہدایت دی گئی ہے کہ وہ کسی بھی حالت میں اس سیرپ کی فروخت یا تقسیم نہ کریں۔ محکمہ صحت نے نفاذی اقدامات شروع کر دیے ہیں اور عوامی سلامتی کو لاحق ممکنہ خطرات کے پیش نظر صورتحال پر کڑی نظر رکھی جا رہی ہے۔
