احمد آباد(این این آئی)بھارتی ریاست گجرات میں ایک 17 سالہ لڑکی نے بوائے فرینڈ کے ہاتھوں اپنے ہی والد کو قتل کروا دیا۔بھارتی میڈیا کے مطابق لڑکی نے اپنے والد کو نیند کی گولیاں دے کر بیہوش کیا اور پھر اس کے بوائے فرینڈ نے دوست کے ساتھ مل چاقو کے وار کر کے لڑکی کے والد کو قتل کردیا جبکہ لڑکی یہ منظر کھڑکی سے دیکھتی رہی۔ مقتول کی شناخت شانا چاوڑا کے نام سے ہوئی ہے جو اپنی بیٹی کے رشتے کے سخت خلاف تھا۔ لڑکی اور اس کا 24 سالہ بوائے فرینڈ رنجیت گجیندر رواں سال جولائی میں گھر سے فرار ہو گئے تھے جس کے بعد والد نے رنجیت کے خلاف مقدمہ درج کروا دیا تھا۔رنجیت کو جولائی میں گرفتار کرنے بعد اگست میں ضمانت پر رہا کر دیا گیا تھا۔

گزشتہ تین ماہ سے لڑکی اور اس کے بوائے فرینڈ نے والد کو قتل کرنے کی منصوبہ بندی کر رکھی تھی۔16 دسمبر کو لڑکی اپنے والدین کو نشہ آور دوا دینے کی کوشش میں ناکام رہی تاہم 18 دسمبر کی رات لڑکی نے کھانے میں نیند کی گولیاں ملا دیں، جب لڑکی کا والد بے ہوش ہو گیا تو رنجیت اور اس کا دوست کمرے میں داخل ہوا اور چاقو سے متعدد وار کر کے اسے قتل کر دیا۔پولیس حکام کے مطابق لڑکی کھڑکی سے اپنے والد کے قتل کا ہولناک منظر دیکھتی رہی تاکہ اس بات کی تصدیق ہو سکے کہ اس کے اور اس کے بوائے فرینڈ کے خلاف کوئی رکاوٹ باقی نہیں بچی۔ پولیس نے رنجیت اور اس کے دوست کو گرفتار کر لیا ہے جبکہ نابالغ لڑکی کو چائلڈ پروٹیکشن ہوم بھیج دیا ہے۔