اسلا م آبا د (نیوز ڈ یسک)سندھ حکومت نے کراچی میں موٹر سائیکل چلانے والوں پر عائد کیے جانے والے زیادہ جرمانوں میں نرمی کرنے پر آمادگی ظاہر کر دی ہے۔ اس حوالے سے سندھ اسمبلی کی خصوصی کمیٹی برائے ای چالان کا اجلاس منعقد ہوا، جس کی صدارت صوبائی وزیرِ داخلہ ضیاء الحسن لنجار نے کی۔اجلاس کے دوران اپوزیشن لیڈر علی خورشیدی کی تجویز پر حکومت نے موٹر سائیکل سواروں کے چالان کم کرنے پر اتفاق کیا۔ ذرائع کے مطابق ایک ہزار سی سی تک کی گاڑیوں پر لگنے والے جرمانوں میں بھی کمی پر غور کیا جا رہا ہے۔
اس موقع پر علی خورشیدی نے کہا کہ محض جرمانوں میں اضافہ ٹریفک مسائل کا حل نہیں۔ ان کا کہنا تھا کہ مؤثر ٹریفک نظام کے لیے فعال سگنلز، واضح لین مارکنگ اور بہتر انفراسٹرکچر ناگزیر ہے، جبکہ کراچی کی بیشتر سڑکوں پر نہ لین کے نشانات موجود ہیں اور نہ ہی سگنلز درست طریقے سے کام کر رہے ہیں۔اپوزیشن لیڈر نے مؤقف اختیار کیا کہ موٹر سائیکل سواروں پر بھاری جرمانے غریب اور متوسط طبقے کے ساتھ ناانصافی ہیں۔ ان کے مطابق جب تک بنیادی سہولیات بہتر نہیں کی جاتیں، اس وقت تک سخت جرمانے قابلِ قبول نہیں ہو سکتے۔ انہوں نے مزید کہا کہ ٹریفک قوانین کے نفاذ میں شفافیت اور اصلاحات کی اشد ضرورت ہے۔ ہم ای چالان نظام کے مخالف نہیں، مگر اس میں عائد جرمانوں کو مناسب سطح پر لانے کے لیے عملی اقدامات کر رہے ہیں۔
