کابل(این این آئی)افغانستان کی طالبان حکومت نے افغانستان اور ازبکستان کے درمیان قائم مشترکہ سرحدی مارکیٹ میں محرم کے بغیر سفر کرنے والی خواتین کے داخلے پر پابندی عائد کردی۔ افغان میڈیا کے مطابق شمالی صوبے بلخ کے مقامی ذرائع کا کہنا تھا کہ طالبان حکام ان خواتین کو بازار میں جانے کی اجازت نہیں دے رہے جنہیں وہ بغیر محرم کے سفر کرنے والی قرار دیتے ہیں۔سرحدی قصبے حیرتان کے رہائشیوں کے مطابق طالبان اہلکار ان خواتین کو جو بغیر محرم سفر کرتی ہیں مارکیٹ میں داخل ہونے سے روک دیتے ہیں۔
یہ بازار افغانستان اور وسط ایشیا کے کئی ممالک سے آنے والے افراد کے لیے قائم کیا گیا ہے۔ذرائع کا کہنا تھا کہ طالبان اہلکار خواتین اور ان کے ساتھ موجود افراد کو مارکیٹ میں داخلے سے روکتے ہیں، ان کی شناختی دستاویزات کی جانچ سے گریز کرتے ہیں اور انہیں زبانی بدسلوکی اور توہین آمیز سلوک کا سامنا کرنا پڑتا ہے۔ ایک افغان شہری نے افغان میڈیا کو بتایا کہ ہمیں اپنی طرف سرحد پر جو ذلت آمیز سلوک سہنا پڑتا ہے وہ ازبک حکام کے رویے سے بھی بدتر ہے۔ذرائع کے مطابق بازار آنے والی افغان خواتین میں اکثر عمر رسیدہ خواتین ہوتی ہیں جو ازبک اور روسی ڈاکٹروں سے علاج کروانے وہاں جاتی ہیں، طالبان کی جانب سے محرم نہ ہونے کی بنیاد پر عائد پابندیوں کے باعث متعدد خواتین صحت کی سہولیات اور دیگر خدمات تک رسائی سے محروم ہو رہی ہیں۔
