کراچی(این این آئی)پاکستانی سابق اداکارہ، گلوکارہ اور سوشل میڈیا انفلوئنسر رابی پیرزادہ نے نئی زندگی کا آغاز کرتے ہوئے شادی کرلی ہے۔رابی پیرزادہ کے نکاح کی تقریب سادگی کے ساتھ نجی سطح پر منعقد ہوئی، جس میں صرف قریبی اہلِ خانہ نے شرکت کی۔رابی نے انسٹاگرام پر تقریب کی تصاویر شیئر کیں جن میں وہ اپنے والدین، بھائی اور ماموں کے ہمراہ نظر آئیں۔ اس موقع پر انہوں نے روایتی کریم اور سرخ لباس زیب تن کیا، جس میں ان کا انداز مداحوں کی توجہ کا مرکز بن گیا۔
اگرچہ رابی پیرزادہ کے شوہر نے تاحال کوئی تصویر شیئر نہیں کی، تاہم رابی کی پوسٹس سے مداحوں کو اس خوشگوار موقع کی جھلک ضرور ملی۔یہ شادی رابی پیرزادہ کی زندگی کا ایک اہم موڑ قرار دی جا رہی ہے، جہاں وہ اپنی ذاتی زندگی کے ایک نئے سفر کا آغاز کر رہی ہیں۔سوشل میڈیا پر مداحوں اور خیر خواہوں کی جانب سے مبارک باد اور نیک تمنائوں کا سلسلہ جاری ہے، جبکہ کئی صارفین نے جوڑے کے لیے خوشیوں اور کامیاب ازدواجی زندگی کی دعائیں کی ہیں۔
واضح رہے کہ حال ہی میں ایک پوڈکاسٹ میں گفتگو کرتے ہوئے رابی پیرزادہ نے شادی کی پیشکشوں سے متعلق کہا تھا کہ انہیں روزانہ کی بنیاد پر پروپوزلز موصول ہوتے ہیں، حتی کہ ان کی فاونڈیشن کے نمبرز پر آنے والے ہر تیسرے پیغام میں شادی کی پیشکش ہوتی ہے۔تاہم ان کا کہنا تھا کہ وہ اپنی ذاتی زندگی پر بات کرنا پسند نہیں کرتیں اور نجی معاملات میں مداخلت کی اجازت نہیں دیتیں۔
