اسلام آباد (نیوز ڈیسک)پاکستان اور افغانستان کے درمیان حالیہ مذاکرات کسی حتمی نتیجے پر نہ پہنچ سکے، البتہ دونوں جانب سے جنگ بندی برقرار رکھنے پر اتفاق کر لیا گیا ہے۔غیر ملکی خبر رساں ادارے رائٹرز کے مطابق یہ ملاقاتیں گزشتہ ہفتے سعودی عرب میں ہوئیں، جو قطر، ترکیہ اور سعودی عرب کی میزبانی میں جاری سفارتی سلسلے کا حصہ تھیں۔ ان مذاکرات کا بنیادی مقصد اکتوبر میں سرحدی جھڑپوں کے بعد پیدا ہونے والی تناؤ کی صورتحال کو کم کرنا تھا۔
رپورٹ میں بتایا گیا ہے کہ دوحہ میں طے پانے والی جنگ بندی اب تک غالباً قائم ہے، تاہم استنبول میں گزشتہ ماہ ہونے والے فالو اپ مذاکرات میں بھی کوئی دیرپا معاہدہ نہ ہو سکا تھا۔ سعودی پیشکش پر ہونے والی تازہ گفتگو میں بھی فریقین کسی سمجھوتے تک نہیں پہنچ پائے۔یاد رہے کہ سرحدی فائرنگ کے واقعات میں متعدد جانیں ضائع ہوئیں تھیں۔ پاکستان کا مؤقف ہے کہ افغان حکومت تحریری طور پر یقین دہانی کرائے کہ وہ پاکستان مخالف مسلح تنظیموں کے خلاف کارروائی کرے گی، جبکہ طالبان وفد ایسی کسی ضمانت پر آمادہ نہیں جس کے باعث مذاکرات میں پیش رفت ممکن نہ ہو سکی۔
