واشنگٹن (اے بی این نیوز) – امریکا نے بھارت کو 93 ملین ڈالر مالیت کے جدید جنگی ہتھیار فروخت کرنے کی منظوری دے دی ہے، جن میں جویلن اینٹی ٹینک میزائل سسٹم اور ایکسکیلیبر گائیڈڈ آرٹلری گولہ بارود شامل ہیں۔نئی دہلی سے موصولہ تفصیلات کے مطابق امریکی دفاعی سکیورٹی تعاون ایجنسی نے ایک بیان میں اس فیصلے کی تصدیق کی ہے، جسے واشنگٹن اور نئی دہلی کے درمیان دفاعی تعلقات میں اہم پیش رفت قرار دیا جا رہا ہے۔

رپورٹ کے مطابق، اس منظوری سے چند ماہ قبل امریکا نے روسی تیل کی خریداری جاری رکھنے پر بھارت پر بھاری ٹیرف بھی عائد کیا تھا، لیکن اب دونوں ممالک دفاعی تعاون کے نئے مرحلے میں داخل ہو رہے ہیں۔ایجنسی کے بیان میں کہا گیا ہے کہ یہ فروخت امریکا کی خارجہ پالیسی اور قومی سلامتی کے مقاصد کے لیے مددگار ثابت ہوگی اور اس سے دونوں ممالک کے اسٹریٹجک تعلقات میں مضبوطی آئے گی۔

بھارت نے اس خریداری کے لیے 216 ایکسکیلیبر ٹیکٹیکل پروجیکٹائلز اور 100 جویلن سسٹمز کی درخواست کی تھی، جبکہ وہ پہلے ہی ایم-777 ہووٹزر توپ خانوں میں ایکسکیلیبر گولہ بارود استعمال کر رہا ہے۔