بھارتی ریاست مہاراشٹر کے شہر وسائی میں ایک افسوسناک واقعہ پیش آیا جہاں اسکول کی ایک ٹیچر کی سخت سزا 13 سالہ طالبہ کی جان لے گئی۔
رپورٹس کے مطابق بچی صرف 10 منٹ لیٹ اسکول پہنچی تھی، جس پر ٹیچر ممتا یادو نے اسے بیگ سمیت 100 اٹھک بیٹھکیں کرنے کا حکم دیا۔ سخت سزا کے دوران بچی کی طبیعت بگڑ گئی۔ گھر پہنچنے کے بعد اس کی حالت مزید خراب ہوئی، اسے پہلے مقامی اسپتال لے جایا گیا اور پھر بائیکلہ کے جے جے اسپتال منتقل کیا گیا، جہاں ایک ہفتے کی جدوجہد کے بعد وہ دم توڑ گئی۔
پولیس نے واقعے میں ملوث ٹیچر کو گرفتار کر لیا ہے۔ ابتدائی تحقیقات سے معلوم ہوا ہے کہ ٹیچر کو صرف بڑی کلاسز پڑھانے کی اجازت تھی، مگر وہ قواعد کی خلاف ورزی کرتے ہوئے آٹھویں جماعت کو بھی پڑھا رہی تھی۔
تحقیقات میں یہ بات بھی سامنے آئی کہ اسکول کے پاس بنیادی سہولیات موجود نہیں تھیں اور وہ ایک جھونپڑی نما عمارت میں چل رہا تھا۔ مقامی حکام نے اس عمارت پر پہلے ’غیر قانونی ڈھانچہ‘ کا بورڈ بھی لگایا تھا، لیکن الزام ہے کہ اسکول انتظامیہ نے وہ بورڈ ہٹا کر معاملہ چھپا دیا۔
