اسلام آباد (نیوز ڈیسک)نئی دہلی/ڈھاکہ: بھارت نے سابق بنگلا دیشی وزیر اعظم شیخ حسینہ واجد کے خلاف بنگلہ دیشی عدالت کے سزائے موت کے فیصلے پر ردعمل ظاہر کیا ہے۔بھارتی وزارت خارجہ کے بیان میں کہا گیا کہ بھارت نے اس عدالتی فیصلے کو دیکھا ہے اور پڑوسی ملک کے طور پر وہ بنگلا دیشی عوام کے بہترین مفادات کے لیے پرعزم ہے۔ بیان میں مزید کہا گیا کہ ان مفادات میں عوام کا امن، جمہوریت اور استحکام شامل ہیں اور بھارت اس مقصد کے لیے تمام اسٹیک ہولڈرز کے ساتھ تعمیری رابطے جاری رکھے گا۔
یاد رہے کہ پیر کے روز بنگلہ دیش کے جسٹس محمد غلام مرتضیٰ کی سربراہی میں تین رکنی ٹریبونل نے شیخ حسینہ واجد کے خلاف دائر مقدمات کا فیصلہ سناتے ہوئے انہیں انسانیت کے خلاف جرائم کا مرتکب قرار دیا۔ عدالت نے تشدد اور قتل کے احکامات دینے کے الزام میں شیخ حسینہ کو ایک کیس میں عمر قید اور دیگر تین الزامات میں سزائے موت سنائی۔ اسی فیصلے میں بنگلہ دیش کے سابق وزیر داخلہ اسد الزمان کمال کو بھی سزائے موت کا حکم دیا گیا۔اس فیصلے کے بعد بنگلہ دیش کی وزارتِ خارجہ نے بھارت سے مطالبہ کیا ہے کہ وہ شیخ حسینہ اور سابق وزیر داخلہ اسد الزمان خان کو فوری طور پر حوالگی کرے تاکہ بنگلہ دیش میں سنائے گئے فیصلے پر عمل درآمد کیا جا سکے۔
