اسلام آباد (نیوز ڈیسک)کیا آپ صرف ساڑھے نو فٹ چوڑا گھر خریدنے کا تصور کر سکتے ہیں؟ اگر ہاں، تو جان لیں کہ امریکی شہر نیویارک میں واقع یہ منفرد گھر خریدنے کے لیے آپ کو کروڑوں روپے درکار ہوں گے۔نیویارک کی بیڈ فورڈ اسٹریٹ پر موجود یہ مکان اپنی تنگ ساخت کے باعث مشہور ہے اور اس کی عمر 152 سال بتائی جاتی ہے۔ اس تاریخی مکان، جسے مایلے ہاؤس کہا جاتا ہے، میں ماضی میں کئی مشہور ہالی ووڈ فنکار بھی رہ چکے ہیں۔

یہ گھر اب فروخت کے لیے پیش کیا گیا ہے اور اس کی قیمت 41 لاکھ 90 ہزار امریکی ڈالر (تقریباً ایک ارب 18 کروڑ پاکستانی روپے) رکھی گئی ہے۔گھر کو فروخت کے لیے پیش کرنے والی ریئل اسٹیٹ کمپنی کے مطابق، اگرچہ یہ عمارت باہر سے بہت تنگ دکھائی دیتی ہے، مگر اندر داخل ہونے پر یہ کشادہ، روشن اور آرام دہ محسوس ہوتی ہے۔اس مکان کا طرزِ تعمیر ڈچ طرز پر ہے اور یہ تین منزلوں پر مشتمل ہے۔ عقبی حصے میں ایک چھوٹا سا خوبصورت باغ بھی موجود ہے۔

گھر میں تین بیڈ رومز اور دو باتھ رومز کے ساتھ ساتھ چار آتش دان، فرش سے چھت تک اونچے فرنچ دروازے اور کئی کھڑکیاں موجود ہیں، جو اسے خاص کشش فراہم کرتی ہیں۔دلچسپ بات یہ ہے کہ یہ عمارت نیویارک کے مشہور سیاحتی مقامات میں سے ایک سمجھی جاتی ہے، اور کئی سیاح صرف اس کی تصویریں لینے کے لیے یہاں آتے ہیں۔رپورٹس کے مطابق، 2023 میں ایک ڈاکٹر نے یہ گھر 34 لاکھ ڈالر میں خریدا تھا، اور اس کی بیٹی زیادہ تر وقت وہیں گزارتی تھی۔یعنی بظاہر چھوٹا مگر تاریخی اور نایاب یہ گھر آج بھی نیویارک کی شان سمجھا جاتا ہے۔