کوئٹہ (نیوزڈیسک)ضلع بولان کی تحصیل بھاگ میںامام بارگاہ میں دھماکہ کے نتیجہ میں10افراد جاں بحق ، متعددزخمی ہوگئے، صوبائی وزیر داخلہ نے ہلاکتوں کی تصدیق کر دی ۔ تفصیلات کے مطابق جمعرات کی رات کو ضلع بولان کے علاقے تحصیل بھاگ میں چھلگری امام بارگاہ میں اس وقت دھماکہ ہوا جب امام بار گاہ میں مجالس کی تیاریاں جاری تھیں اطلاعات کے مطابق دھماکے میں10افراد جاں بحق ہوگئے جبکہ متعددافراد زخمی ہیں۔ صوبائی وزیر داخلہ میر سرفراز بگٹی نے اس واقعے کی شدید الفاظ میں مذمت کی ہے انہوںنے کہاکہ ڈپٹی کمشنر سمیت مقامی انتظامیہ کودھماکے کی جگہ پر بھیج دیاگیا ہے اگر ضرورت پڑی تو ہیلی کاپٹر کے ذریعے زخمیوںکو کوئٹہ لایا جائے گا۔ انہوںنے کہاکہ میرے پاس10افراد کے ہلاکتوںکی اطلاع آئی ہے ۔ انہوں نے کہا کہ امام بارگا ہ کا ظمیہ میں دھماکہ مغرب کی نماز کے وقت ہوا۔پولیس کے مطابق دھماکہ خود کش تھا اور دھماکہ کرنے والے خود کش حملہ آور کا سر مل گیا ہے۔ پولیس اور امدادی ٹیمیں موقع پر پہنچ گئی ہیں اور زخمیوں کو ہسپتال منتقل کیا جا رہا ہے۔پاکستان تحریک انصاف کے چیئر مین عمران خان اور وفاقی وزیر داخلہ چوہدری نثار نے دھماکے کی مذمت کی ہے۔عمران خان کا کہنا ہے کہ حکومتیں ذمہ دارانہ رویہ اپنا کر امن و امان کی صورتحال کو یقینی بنائیں۔انہوں نے مزید کہا کہ دہشت گرد انسانیت کے دشمن ہیں ،ایسے عناصر کو کے خلاف سخت کاروائی کی جائے۔